ETA segjast hætt öllu vopnaskaki

ETA, aðskilnaðarhreyfing Baska, batt í gær enda á vopnaða sjálfstæðisbaráttu sem staðið hefur í 43 ár og kostað 829 mannslíf. ETA lýsti því yfir að samtökin legðu nú endanlega niður vopn, en vopnahlé hefur verið í gildi um nokkra hríð.

Þau hafa þó ekki látið af sjálfstæðiskröfum sínum og hafa kallað eftir viðræðum við stjórnvöld í Frakklandi og á Spáni. José Zapatero, forsætisráðherra Spánar, fagnaði yfirlýsingunni og sagði fréttirnar marka sigur fyrir lýðræðið. Hann lét þó ekkert uppi um hvort til stæði að hefja viðræður við ETA.