Birgitta Jónsdóttir, þingmaður Hreyfingarinnar, segir dóm yfir fjórum af nímenningunum svokölluðu ekki koma sér á óvart. Birgitta mætti niður í Héraðsdóm Reykjavíkur í morgun til að vera viðstödd uppkvaðningu dómsins en náði ekki að vera á meðal þeirra 25 sem fengu að fara inn í dómsalinn áður en honum var lokað vegna fjöldatakmarkana.
Birgitta segir í samtali við fréttamann Vísis sem er staddur í Héraðsdómi að dómurinn sé í takt við það sem hún átti von á, það er að sakfellt sé fyrir minniháttar brot. Hún segir að þessi niðurstaða minni sig á dóm sem var kveðinn upp yfir liðsmönnum náttúruverndarhreyfingarinnar Saving Iceland. Þeir voru þá ákærðir fyrir meiriháttar eignaspjöll en síðan sakfelldir fyrir minni brot.
