Öryggisbót við hættuleg gatnamót

Vegagerðin hefur óskað eftir tilboðum í gerð ganga undir Reykjanesbraut við innkeyrslu að álverinu í Straumsvík.

Göngin verða 23ja metra löng og níu metra breið og vegirnir sem lagðir verða eru 1,7 kílómetrar á lengd. Áætlað er að framkvæmdum verði að fullu lokið 1. júlí á næsta ári.

G. Pétur Matthíasson, upplýsingafulltrúi Vegagerðarinnar, sagði í samtali við Fréttablaðið að fyrst og fremst væri verið að auka umferðaröryggi.

„Það er alltaf okkar aðalmarkmið. Þetta eru hættuleg gatnamót og það hefur lengi verið á áætlun að bæta þar úr.“

G. Pétur segir að fjöldi stórra flutningabíla keyri þar til og frá álverinu á degi hverjum.

„Þeir keyra þarna út í hraða umferð og það er einmitt það sem skapar hættuna,“ segir hann.

Bráðabirgðavegur verður lagður framhjá framkvæmdasvæðinu á meðan vinna stendur yfir.

Tilboð í verkið verða opnuð þriðjudaginn 15. nóvember.- þj