Segir fjármálaráðherrann „stinga höfðinu í steininn“

Þingmaður Framsóknarflokksins, Vigdís Hauksdóttir, sakaði ríkisstjórnina um að hvetja til svartra atvinnustarfsemi hér á landi með skattastefnu sinni þegar hún gerði skýrslu ríkisskattstjóra og aðila atvinnulífsins um svarta atvinnustarfsemi að umtalsefni á Alþingi í morgun. Þar kom fram að tap ríkissjóðs vegna svartrar atvinnustarfsemi væru tæplega 14 milljarðar króna.

Steingrímur J. Sigfússon, fjármálaráðherra, var ekki sammála þessu og vitnaði í skýrslu vinnuhóps, sem rannsakaði skattsvik árið 2004, og vildi ráðherrann meina að umfangið þá væri svipað og nú. Því væri ekki við núverandi ríkisstjórn að amast.

Vigdís var reyndar ekki par ánægð með svarið og svaraði því orðrétt: „Virðulegi forseti, hæstvirtur fjármálaráðherra hefur farið þá leið að stinga höfðinu í steininn og benda á eldgamlar tölur frá árinu 2004.“

Hún bætir svo við að hún hafi verið að spyrja um nútíðina og framtíðina, ekki hvernig málum var háttað fyrir um áratugi síðan.