Grindvíkingar upp í toppsætið

Grindvíkingar komust á topp Iceland Express deildar karla með sannfærandi ellefu stiga sigri á Tindastól, 77-66, í Röstinni í Grindavík í gærkvöldi.

Grindavíkurliðið fór upp fyrir Snæfellinga með þessum sigri en Hólmarar geta endurheimt toppsætið með sigri á Njarðvík á morgun. KR-ingar og Keflvíkingar hafa líka byrjað nýtt ár af miklum krafti og unnu bæði lið góða útisigra í gær.

Grindvíkingar hafa unnið vel úr mótlæti í upphafi ársins og eru búnir að vinna sex leiki í röð í Iceland Express deildinni. Þrjá þá síðustu hafa þeir spilað Kanalausir eftir að bandaríski leikmaðurinn Brock Gillespie sveik þá og sá til þess að þeir hafa verið án Kana í öllum leikjum sínum á árinu 2011.

Páll Axel Vilbergsson átti frábæran leik og var með 26 stig, 11 fráköst og 5 stoðsendingar. Páll Axel hitti úr 10 af 14 skotum sínum í leiknum.

Magnús Þór Gunnarsson var í stuði í tíu stiga sigri Keflavíkur, 102-92, á Stjörnunni í Garðabæ. Stjarnan var 26-17 yfir eftir fyrsta leikhlutann en þá var komið að þætti Magnúsar, sem skoraði 26 stig í síðustu þremur leikhlutunum.

Magnús er nýgenginn til liðs við Keflavík frá nágrönnunum í Njarðvík.

Thomas Sanders var stigahæstur Keflvíkinga með 32 stig og hefur leikið það vel í sínum fyrstu leikjum með liðinu að þeir hafa ekki fundið fyrir því að Lasar Trifunovic, stigahæsti leikmaður deildarinnar, hefur ekkert spilað í þremur fyrstu leikjum ársins.

KR-ingar byrja nýja árið af miklum krafti en liðið vann sannfærandi 32 stiga sigur á Haukum, 106-74, og hefur því unnið alla fjóra leiki ársins 2011 í deild (3) og bikar (1).

Marcus Walker átti stórleik hjá KR og skoraði 35 stig, þar af 15 þeirra í fyrsta leikhlutanum. Pavel Ermolinskij var með 12 stig, 8 fráköst og 8 stoðsendingar. Semaj Inge skoraði 22 stig fyrr Hauka.