Ágúst: Við eigum möguleika

Íslenska landsliðið hefur á fimmtudaginn leik í undankeppni EM 2012 en þá mæta stelpurnar sterku liði Spánar ytra. Ísland leikur svo gegn Úkraínu á sunnudaginn en þar að auki er Sviss í sama riðli. Tvö lið komast áfram í úrslitakeppnina sem fer fram í Hollandi í desember á næsta ári.

Spánn er fyrirfram talið sterkasta liðið í riðlinum. Ágúst Þór Jóhannesson landsliðsþjálfari er þó hvergi banginn. „Spánn er með mjög sterkt lið en getur þó líka dottið ansi langt niður ef leikmenn hitta ekki á sinn dag. Ef við náum okkar besta fram eigum við góðan möguleika," sagði Ágúst. „Ég hef lagt mikla áherslu á sóknarleikinn og að fækka mistökum í honum. Góð lið eru mjög fljót að refsa fyrir slík mistök."

Sextán leikmenn fóru utan í morgun en tveir leikmenn urðu eftir vegna meiðsla – skyttan Rut Jónsdóttir og Guðrún Ósk Maríasdóttir markvörður.

Ísland spilar svo á HM í Brasilíu í desember næstkomandi.