Stjórnarformaður Bankasýslunnar kannast ekki við frétt RÚV

Stjórnarformaður Bankasýslu ríkisins, Þorsteinn Þorsteinsson, kannast ekki við það að Páll Magnússon taki ekki til starfa sem forstjóri Bankasýslu ríkisins eins og fréttastofa RÚV greindi frá.

Þar kom fram að það væri ljóst að Páll myndi ekki verða forstjóri en ráðning hans, sem stjórnin hefur meðal annars varið, hefur verið gagnrýnd harðlega. Þá sagði í frétt RÚV að mikil andstaða væri við stöðuveitinguna innan beggja stjórnarflokka og mat manna að trúverðugleiki Bankasýslunnar sé í húfi.

Aðspurður segist Þorsteinn ekki hafa fengið þau skilaboð frá Páli að hann ætli ekki að taka við starfinu.

Stjórnin mun hittast á þriðjudaginn. Ekki náðist í Pál Magnússon við vinnslu fréttarinnar.