Innleiða meiri aga við fjárlagagerð

Fjárlaganefnd Alþingis ætlar að innleiða meiri aga og betri vinnubrögð við fjárlagagerð. Þetta kemur fram í áliti fjárlaganefndar frá því í september vegna skýrslu Ríkisendurskoðunar um ríkisreikning fyrir árið 2009.

Sigríður Ingibjörg Ingadóttir, formaður fjárlaganefndar, segir að málið hafi verið á meðal þess sem rætt var á fundi nefndarinnar með hópi sérfræðinga í opinberum fjármálum á vegum Alþjóðagjaldeyrissjóðsins í dag. Nefndin sé hér í hálfsmánaðarheimsókn á vegum fjármálaráðuneytisins. Nefndin veiti tæknilega ráðgjöf varðandi endurskoðun fjárreiðulaga og fjárlagaferla.

Á meðal þess sem verður gert er að leggja fram rammafjárlög til fjögurra ára í apríl árið 2012. Sérfræðingar Alþjóðagjaldeyrissjóðsins veita meðal annars leiðsögn og koma með dæmi um hvernig best verður staðið.