Hlutabréf í Evrópu taka dýfu - hefur áhrif á Íslandi

Hlutabréfaverð í Evrópu tók enn aðra dýfuna og evran veiktist gagnvart dollaranum í morgun, en áhyggjur fjárfesta af því að evrópska skuldakrísan muni versna hafa verið að aukast samkvæmt morgunkorni Íslandsbanka.

Þar kemur fram að gull hefur verið að hækka í verði, olían að lækka og skuldatryggingarálag ríkja í Evrópu að hækka af sömu ástæðum. Nemur lækkun S&P Europe 350 vísitölunnar 2,5% í morgun og er hlutabréfaverð að lækka á öllum helstu hlutabréfamörkuðum innan svæðisins.

Fréttir frá Þýskalandi, Grikklandi, Ítalíu...

Ástæða þess að áhyggjur fjárfesta af því að bót verði ráðin á skuldavanda ríkja  Evrópu hafa aukist er sú að flokkur Angelu Merkel, kanslara Þýskalands, tapaði kosningum í sínu heimafylki. Einnig hafa opinberast vandræði í samstarfi Alþjóðagjaldeyrissjóðsins og Evrópusambandsins við grísk stjórnvöld við að taka á skuldavanda gríska ríkisins og auk þess virðist ganga illa hjá ítölskum stjórnvöldum að standa við þann niðurskurð sem þarf að gera í ríkisfjármálum þar í landi.

...og Bretlandi

Tölur sem benda til þess að það sé að hægja á hagvexti ríkja heims berast nú víða að. Í morgun lækkaði breska pundið nokkuð þegar tölur bárust um að umsvifin í þjónustugeiranum þar í landi hefðu í síðasta mánuði verið þau minnstu í meira en áratug. Þá voru birtar vinnumarkaðstölur fyrir Bandaríkin á föstudaginn sem sýndu að fjöldi starfa stóð í stað í ágúst síðastliðinn og atvinnuleysi var óbreytt í 9,1% frá því í júlí. Lækkaði verð hlutabréfa í Bandaríkjunum við þær fréttir.

Hefur talsverð áhrif hér

Samkvæmt tölum um erlenda stöðu þjóðarbúsins í lok annars ársfjórðungs sem Seðlabankinn birti í lok síðustu viku voru erlendar eignir þjóðarbúsins þá 2.470 ma.kr. Af því var eign í erlendu hlutafé 594 ma.kr. eða nær 40% af áætlaðri landsframleiðslu þessa árs. Gangur mála á erlendum hlutabréfamörkuðum hefur því talsvert að segja um þróun eignastöðu innlenda aðila. Þess má geta að þessar erlendu eignir eru að mestu í almennri eigu þar sem stærsti hluti þeirra er í eigu lífeyrissjóðanna, en þeir áttu 418 ma.kr. í erlendum hlutabréfum og hlutabréfasjóðum í lok júlí síðastliðins.

Áhrifin á eign innlendra aðila í erlendum hlutabréfum og hlutabréfasjóðum er þó ekki nema lítill hluti þeirra áhrifa sem umrótið á erlendum mörkuðum hefur á íslenska hagkerfið, líkt og við höfum áður ritað um.

Skuldakrísa sú sem ríki heims glíma við um þessar mundir hægir á þeirri uppsveiflu sem vænst hefur verið hér á landi. Ef af samdrætti verður í hagkerfi heimsins líkt og ýmsir óttast um þessar mundir mun það líklegast draga íslenska hagkerfið með sér. Vaxandi skuldavandi ríkja heims er því talsvert áhyggjuefni varðandi hagvaxtarhorfur hér á landi eins og greinir frá í morgunkorni Íslandsbanka.