Sýnis­hornið of ó­líkt borð­plötunni sem skilaði sér heim

Þetta er niðurstaða kærunefndar vöru- og þjónustukaupa. Söluaðili borðplötunnar skal þannig endurgreiða kaupandanum 997 þúsund krónur, auk þess að fjarlægja plötuna af heimili kaupandans.

Í úrskurðinum eru málsatvik rakin. Þar segir að kaupandinn hafi pantað og greitt fyrir steinplötuna og uppsetningu. Hann hafi áður séð steininn í verslun og fengið sýnishorn með sér heim. Við uppsetningu hafi kaupandinn tekið eftir því að borðplatan væri ekki sambærileg sýnishorninu, né þeim myndum sem birtar voru á heimasíðu verslunarinnar.

Áberandi ryðbrúnar æðar

Fram kemur að á steinplötunni sem komið var fyrir á heimilinu hafi verið áberandi ryðbrúnar æðar og að kaupandinn hafi þegar í stað haft samband við framkvæmdastjóra verslunarinnar og gert athugasemdir. 

Þá hafi kaupandinn einnig mætt í verslunina og kvartað auk þess að senda tölvupóst þar sem farið var fram á að plötunni yrði skipt út.

Mismunandi æðar og mynstur

Forsvarsmenn verslunarinnar vísuðu til þess að um væri að ræða svokallaðan náttúrustein og að því væri eðlilegt að mynstur og æðar væru mismunandi. Prufur og sýnishorn gætu ekki endurspeglað nákvæmlega hvernig hver og ein plata yrði úr sömu steintegund. 

Þá væru brúnar æðar algengar í steini af umræddri gerð. Ennfremur bentu þeir á að kaupandinn hafi ekki tekið sérstaklega fram að hann vildi steinplötu án slíkra æðamynstra og að borðplatan gæti því ekki talist gölluð í skilningi laga um neytendakaup.

Ekkert ryðbrúnt á sýninshorninu

Í niðurstöðukafla úrskurðarins segir að kaupandinn hafi valið og pantað borðplötu af ákveðinni steintegund sem sé náttúrusteinn. Af heiti slíks efnis megi leiða að hver plata kunni að vera einstök og að ákveðinn blæbrigðamunur geti komið fram milli einstakra fleka.

„Hins vegar bendir kærunefndin á að samkvæmt framlögðum gögnum í málinu fékk sóknaraðili [kaupandinn] afhent sýnishorn frá varnaraðila [versluninni] þar sem ryðbrún litbrigði komu ekki fram. Þá liggur ekkert fyrir um að sóknaraðila hafi verið gerð grein fyrir því að afhent vara kynni að vera frábrugðin sýnishorni eða myndum á heimasíðu varnaraðila. Sem seljandi og sérfræðingur bar varnaraðila að mati kærunefndarinnar að upplýsa sóknaraðila sérstaklega um að endanleg vara kynni að vera frábrugðin sýnishorni vegna eðlis náttúrusteins, þ.á.m hvað varðar litbrigði,“ segir í úrskurðinum.

Réttmætar væntingar

Nefndin taldi því að kaupandinn hafi haft réttmætar væntingar um að varan sem afhent yrði yrði sambærileg kynningarefni verslunarinnar. Ekki verði fallist á að ryðbrúni liturinn, sem sé áberandi á hinni afhentu borðplötu, teljist eðlilegur og fyrirsjáanlegur eiginleiki vörunnar þrátt fyrir að gera megi ráð fyrir að náttúrusteinn sé ekki alltaf eins.

Nefndin taldi því að fallast yrði á það með kaupandanum að borðplata væri haldin galla í skilningi laga um neytendakaup. Kaupandanum væri því heimilt að rifta kaupunum og bæri versluninni að endurgreiða kaupverð hennar, 996.820 krónur, auk þess að bera kostnaðinn af því að fjarlægja plötuna.