Kvikmyndin Eldfjall keppir í Cannes

19. apríl 2011 13:07

Eldfjall var tekin upp á Íslandi síðastliðið haust. Theodór Júlíusson leikur aðalhlutverkið, Hannes, 67 ára gamlan mann sem þarf að takast á við val fortíðarinnar og erfiðleika nútímans til að eiga möguleika á framtíð.

Eldfjall, fyrsta kvikmynd Rúnars Rúnarssonar leikstjóra, verður frumsýnd á kvikmyndahátíðinni í Cannes 13. maí. Eldfjall keppir bæði í flokknum Directors Fortnight og um Camera d´Or verðlaunin. Þetta kemur fram í tilkynningu frá framleiðendum Eldfjalls hjá Zik Zak kvikmyndum.

Kvikmyndahátíðin í Cannes fer fram dagana 11. til 22. maí og er þetta í annað skiptið sem íslensk mynd er valin í flokkinn Directors Fortnight. Atómstöðin í leikstjórn Þorsteins Jónssonar keppti árið 1984. Eldfjall keppir einnig um hin virtu Camera d´Or verðlaun en þau eru veitt fyrir bestu fyrstu kvikmynd leikstjóra.

Eldfjall var tekin upp á Íslandi síðastliðið haust. Hún fjallar um Hannes, 67 ára gamlan mann sem er að komast á eftirlaunaaldur. Hann er karlmaður af gamla skólanum, einangraður frá fjölskyldunni og heimilinu og þarf nú að takast á við nýtt hlutverk í lífinu. Með aðalhlutverk fara Theodór Júlíusson, Margrét Helga Jóhannsdóttir, Elma Lísa Gunnarsdóttir og Þorsteinn Bachmann.

Rúnar Rúnarsson leikstjóri útskrifaðist frá Danska Kvikmyndaskólanum árið 2009. Stuttmyndir hans Smáfuglar, Anna og Síðasti bærinn hafa farið sigurför um heiminn og unnið um eitthundrað alþjóðleg kvikmyndaverðlaun. Anna keppti í flokki stuttmynda í Directors Fortnight árið 2009, Smáfuglar keppti um Gullpálmann í flokki stuttmynda árið 2008 og Síðasti bærinn var tilnefnd til Óskarsverðlauna í flokki stuttmynda árið 2006.

Kvikmyndin Eldfjall er íslensk/dönsk samframleiðsla Zik Zak Kvikmynda og Fine & Mellow í Danmerku. Myndin var styrkt af Kvikmyndamiðstöð Íslands, New Danish Screen, Nordic Film & TV Fond með stuðningi frá Iðnaðarráðuneytinu. Myndin er framleidd af Þóri Snæ Sigurjónssyni, Skúla Fr. Malmquist og Egil Dennerline.

Flokkurinn Directors Fortnight hóf göngu sína árið 1969 sem hliðarkeppni á kvikmyndahátiðinni í Cannes. Margir heimsþekktir leikstjórar hafa stigið sín fyrstu skref í þeim flokki. Þar á meðal eru George Lucas, Martin Scorsese, Francis Ford Coppola, Spike Lee og Ang Lee. Myndir sem slegið hafa eftirminnilega í gegn í þessum flokki eru meðal annars Billy Elliot, The Blair Witch Project og The Virgin Suicides í leikstjórn Sofia Coppola.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir