Afgreiðslutími og öryggi í verslunum

Síðustu daga hef ég hitt félaga mína í VR sem starfa við afgreiðslustörf í verslunum. Að mínu mati má þar margt betur fara og ber þar hæst opnunartími verslana.

VR á að berjast fyrir fjölskylduvænni stefnu. En opnunar tími verslana er ekki fjölskylduvænn, opið alla daga allan ársins hring í mörgum verslunum, langt fram á kvöld og jafnvel allan sólarhringinn. Sem að sjálfsögðu leiðir til hærra vöruverðs.

Þurfa Íslendingar að versla sér buxur og skó um miðja nætur? Eða að kaupa í matinn? Ég geri mér fulla grein fyrir að einhverjir launamenn þurfa að versla á þessum tíma, en er þá ekki auðveldara að hafa fáar verslanir opnar og skipta opnunum niður á þær verslanir?

Á sunnudögum ætti allt að vera lokað, í mesta lagi að hafa opið einn sunnudag í mánuði. Hér þarf svo sannarlega bæði lagabreytingu og breytingu á hugarfari landans. Höfum við efni á að hafa allar þessar verslanir opnar?

Skilar þessi opnunartími hagnaði til eiganda? Hugsið þið einhvern tíma til afgreiðslufólksins þegar þið verslið á kvöldin og um helgar? Eigum við ekki að taka höndum saman og vinna gegn þessum langa opnunartíma?

Ungt fólk í afgreiðslustörfum

Mér er spurn hvernig staða barnanna okkar er þegar þau ráða sig í vinnu til stórmarkaða. Hvernig er verklagi háttað þegar þau skrifa undir ráðningasamninga, sem ég vona að allir geri samkvæmt lögum. Fá þau að taka ráðningasamninginn með sér heim til að ræða við mömmu og pabba eða hafa samband við stéttarfélagið sitt, VR, til halds og trausts og upplýsinga um réttindi sín?

Ég hef grun um að ekki séu allir starfsmenn að skrifa undir ráðningasamninga við ráðningu. Það er til vansa ef unga fólkið okkar sem er að stíga sín fyrstu skref á vinnumarkaðnum er ekki upplýst um réttindi sín af atvinnurekanda, þau þora oft ekki að spyrja. Sem móðir vil ég gæta hagsmuna yngstu félagsmannanna; kynna þeim réttindi sín og skyldur.

Verið er að stofna ungliðahreyfingu innan VR, þar held ég að ungt fólk ætti að vera við stjórnvölinn, kenna jafnöldrum sínum allt um réttindamál og hvað ráðningasamningurinn á að innihalda. Margt að því unga fólki sem ég hef hitt er ómeðvitað um réttindi sín og þessu þarf að breyta. Um leið og ungt fólk starfar að réttindamálum sínum öðlast það reynslu til að taka við trúnaðarstörfum í VR, framtíðar stjórnendur.

Öryggi í vinnustaðnum

Mikið af ungu fólki vinnur við afgreiðslu í söluturnum á kvöldin og um helgar oft ungar stúlkur. Ég kom inn í söluturn þar sem ung stúlka var ein við afgreiðslustörf, mikið var að gera þar sem allir voru að versla „laugardagsnammi".

Afgreiðslustúlkan komst hvorki í mat eða á salerni þar sem hún var ein. Hvað ef á hana hefði verið ráðist? Ég ræddi við fleiri stúlkur og bar þeim saman um að vera alltaf hræddar þegar þær væru einar á vakt á kvöldin og um helgar.

Ég spyr: Er þetta forsvaranlegt? Hvers vegna eru ekki fleiri saman á vaktinni, bæði vegna öryggisins og til að afgreiðslufólkið geti notið matarhlés? Ég vildi ekki vita af mínu barni í þessari aðstöðu, stöðugur ótti í vinnunni. Hefur þú kæra foreldri hugsað um þessa hluti? Öryggi á vinnustöðum er eitt af baráttmálum mínum, þar nýtist sú þekking og reynsla sem ég hef öðlast á starfsvettvangi mínum með slysamál.

Það veldur mér miklum áhyggjum að launamenn eru nú settir í þá stöðu að sjá sjálfir um að tilkynna vinnuslys til tryggingafélags atvinnurekanda. Launamenn eru tryggðir í hópvátryggingu af atvinnurekanda og fá sjaldnast vitneskju um hvar atvinnurekandi hefur tryggt þá. Hvernig skilamálar trygginga þeirra eru. Á þessi mál legg ég þunga áherslu á að séu vel kynnt okkar félagsmönnum.

Ég er í framboði til formanns VR, hljóti ég kosningu ætla ég að vinna sérstaklega að málefnum afgreiðslufólks í verslunum, yngstu sem elstu, vinnutíma, öryggismálum og opnunartímum verslana.

Ég vil hvetja félagsmenn til að taka þátt með mér í vinnu sem snýr að þeirra málefnum. Kosningu til formanns og stjórnar VR lýkur kl. 12.00 á hádegi þann 30. mars n.k. Félagsmenn í verslunum, atkvæði greitt mér gefur mér tækifæri til að vinna að ykkar málum.