Húsleitir í Lúxemborg - Ólafur á staðnum

Ólafur Þ. Hauksson, sérstakur saksóknari, staðfestir í samtali við Vísi að embætti hans hafi gert húsleitir í Lúxemborg í morgun.

Fram kom í fréttatilkynningu frá efnahagsbrotadeild bresku lögreglunnar, Serious Fraud Office, að húsleitir hefðu verið gerðar hjá þremur fyrirtækjum og á tveimur heimilum. Aðgerðirnar eru gerðar í samvinnu sérstaks saksóknara, efnahagsbrotadeildar bresku lögreglunnar og lögreglunnar í Lúxemborg.

Ólafur er staddur í Lúxemborg vegna málsins. Það eina sem ég get sagt um málið er að ég get staðfest að við erum í aðgerðum og fréttatilkynning er væntanleg síðar," segir Ólafur. Hann vill ekkert segja um það hvar farið var í húsleitir. „Við gefum aldrei upplýsingar um leitarstaði," segir Ólafur í samtali við Vísi.