Að minnsta kosti átta látnir í Sendai

Að minnsta kosti átta létust þegar tíu metra há flóðbylgja skall á hafnarbænum Sendai í Japan í morgun í kjölfar gríðarlega öflugs jarðskjálfta á svæðinu. Skjálftinn mældist 8,9 á richter skalanum og er sjöundi stærsti skjálfti í sögunni. Flóðbylgjan hreif með sér bíla og skip í höfninni og eyðilagði fjölda húsa. Þá hefur skemmtigarður Disney í Tókíó orðið illa úti auk þess sem mikill eldur geisar í olíuhreinsistöð í borginni Ichihara.

Stórir eftirskjálftar hafa fylgt í kjölfar stóra skjálftans en hann fannst greinilega í Beijing höfuðborg Kína sem er í 2400 kílómetra fjarlægð.

Forsætisráðherra Japans, Naoto Kan, segir að engar skemmdir hafi orðið á kjarnorkuverum landsins og hefur japanski herinn sent hersveitir á flóðasvæðin til að aðstoða við björgunarstörf.

Víðtæk flóðbylgjuviðvörun er í gildi á stærstum hluta Kyrrahafsin, þar á meðal í Tævan, Fillipseyjum, Indónesíu, Hawaí og í Ástralíu. Rússnesk yfirvöld á Shakalín eyju hafa flutt um ellefu þúsund íbúa frá strandlengjunni en þar er búist við öflugri flóðbylgju. Hið sama er verið að gera á Hawaí.