Sameiningin hefur veruleg áhrif á sparisjóðakerfið

Fyrirhugaður samruni Spkef sparisjóðs og Landsbankans sem tilkynnt hefur verið um mun hafa veruleg áhrif á sparisjóðakerfið í heild enda vegur Spkef sparisjóður þungt í heildarefnahag sparisjóðakerfisins, segir í tilkynningu frá Bankasýslu ríkisins.

Bankasýsla ríkisins fer með stofnfjáreign ríkissjóðs í fimm af starfandi sparisjóðum landsins og því ljóst að rík ábyrgð hvílir á Bankasýslunni að taka þátt í stefnumótun varðandi framtíðarfyrirkomulag á starfsemi sparisjóðanna.

Því hyggst Bankasýslan leita leiða til að tryggja áframhaldandi sameiginlega þjónustu sparisjóðanna þannig að sem minnst neikvæð áhrif hafi á rekstur þeirra.

Bankasýslan mun á næstu dögum eiga náið samráð við stjórnendur og stjórnir sparisjóða um hvernig hagsmunum sparisjóðanna verður best borgið í ljósi breyttra aðstæðna.