Komið að skuldadögum hjá Reykjanesbæ

„Eytt hefur um efni fram og nú er komið að skuldadögum," segir í bókun sem fulltrúar Samfylkingar lögðu fram á fundi bæjarstjórnar Reykjanesbæjar í gær þar sem fjárhagsáætlun bæjarfélagsins fyrir árið 2011 var samþykkt af bæjarfulltrúum Sjálfstæðisflokksins en minnihlutinn sat hjá.

Bæjarfulltrúar Samfylkingarinnar, þau Friðjón Einarsson, Guðný Kristjánsdóttir og Eysteinn Eyjólfsson, lögðu fram bókun við þetta tilefni þar sem segir meðal annars að fjárhagsáætlun bæjarins fyrir árið sem nú er hafið sé einsdæmi í sögu bæjarfélagsins vegna þess niðurskurðar sem henni fylgir.

„Ljóst er að niðurskurður í öllum málaflokkum er staðreynd þrátt fyrir gefin loforð sjálfstæðismanna um annað og að fjárhagsstaða Reykjanesbæjar og tengdra fyrirtækja er með þeim hætti að ekki verður við unað," segir í bókuninni.

Þar kemur ennfremur fram að Reykjanesbær skuldar án samstæðu 29 milljarða eða eða 400% af tekjum Skuldir bæjarsjóðs hafa meira en fimmfaldast frá 2002. Þær voru rúmlega 5 miljarðar en eru nú árið 2011 rúmlega 29 miljarðar.

Reykjanesbær skuldar með samstæðu 42 milljarða Þar vegur mest fimmföldun skulda Reykjaneshafnar frá 2002 . Árið 2002 voru skuldir hafnarinnar 1,2 milljarðar en eru nú tæplega 6 milljarðar.

„Afleiðingar viðvarandi rekstrarhalla sjálfstæðismanna á bæjarsjóði Reykjanesbæjar síðustu árin munu nú skella á íbúum bæjarins af fullum þunga á árinu 2011 með minni þjónustu og hærri álögum," segir í bókun fulltrúa Samfylkingar.

Þeir benda á að skýrt kemur fram í lögum að þegar sveitarfélög geta ekki lengur staðið í skilum skuli leita aðstoðar Sveitastjórnarráðuneytisins sem getur heimilað jöfnunarsjóði sveitarfélaga að veita bæjarsjóði styrk eða lán.

Þá vekja þeir athygli á þeirri hugmynd sem þeir lögðu fram í septemberbyrjun um að rannsóknarnefnd þriggja óháðra sérfræðinga verði skipuð til að yfirfara stjórnkerfi og stjórnsýslu Reykjanesbæjar.