Dómsmálaráðherrann í Forbrydelsen elskar Ísland

Danski leikarinn Nicolas Bro fer á kostum í hlutverki dómsmálaráðherrans Thomas Buch í dönsku sakamálaþáttunum Forbrydelsen, eða Glæpnum, sem sýndir eru á sunnudagskvöldum á RÚV.

Bro er íslenskum kvikmyndaáhugamönnum að góðu kunnur fyrir leik sinn í Dags Kára-myndinni Voksne Mennesker en hann lék einnig lítið hlutverk í síðustu mynd íslenska leikstjórans, The Good Heart. Bro viðurkennir að hann sé einlægur aðdáandi Dags.

„Ég bíð bara eftir því að hann hringi í mig og biðji mig um að leika í næstu mynd hans. Mér væri alveg sama hversu stórt hlutverk það væri, ég myndi taka því," segir Bro í samtali við Fréttablaðið.

Bro þykir takast einstaklega vel upp sem dómsmálaráðherrann Buch í Glæpnum II. Bro sjálfur segir þennan sérkennilega stjórnmálamann fyrst og fremst vera hugarfóstur handritshöfundanna þótt vissulega sé eitthvað af honum sjálfum í þessari skrautlegu persónu. Sjálfur hafi hann viljað að Buch væri gamaldsdags stjórnmálamaður með hugsjónir.

„Maður saknar svoleiðis manna, stjórnmálamanna sem vinna eftir eigin sannfæringu og eru reiðubúnir að vera mennskir og viðurkenna mistök sín. Ameríkuvæðing stjórnmálanna, allavega hérna í Danmörku, hefur ekki haft góð áhrif," segir Nicolas.

Önnur þáttaröð af Glæpnum sló eftirminnilega í gegn í Danmörku á sínum tíma og hefur notið töluverðra vinsælda hér á landi. Bro segist ekki hafa neina einfalda skýringu á því af hverju þættirnir hafi náð svona mikilli hylli meðal sjónvarpsáhorfenda.

„Kannski er það þessi myrki undirtónn og að þættirnir eru ekki uppfullir af einhverjum klisjum. Það er ekki mikil sápa í þessum þáttum heldur fjalla þeir bara um venjulegt fólk sem er að vinna sína vinnu," segir Bro.

Framleiðendur þáttanna hafa einnig gert mikið úr verklaginu við gerð þáttanna, leikarar fá til að mynda að vita sem minnst um framvinduna.

„Ég veit samt ekki alveg hvort það hafi skipt einhverju máli fyrir mann sjálfan. Og þó, þetta hafði kannski einhver áhrif á stemninguna á tökustað en ég veit ekki hvort það komst til skila, það getur vel verið."

Bro hefur komið nokkrum sinnum til Íslands, meðal annars í tengslum við tökurnar á The Good Heart. Hann segist elska land og þjóð og man sérstaklega eftir útreiðartúr sem hann fór í ásamt fríðum flokki Íslendinga. „Ég var mjög lélegur knapi," segir Bro og skellihlær.

freyrgigja@frettabladid.is