Mugison í viðtali á nektarstöð

„Þetta er eitt skemmtilegasta viðtal sem ég hef farið í lengi,“ segir Örn Elías Guðmundsson, best þekktur sem Mugison. Hann var í tæplega hálftíma löngu viðtali við kanadísku sjónvarpsfréttakonuna Roxanne og stallsystur hennar. Sem er kannski ekki í frásögur færandi nema fyrir þá staðreynd að Roxanna starfar hjá NakedNews-fréttastofunni þar sem allir starfsmennirnir klæða sig úr fötunum á meðan þeir lesa fréttir. Útsendingarnar eru á Netinu og nýtur sjónvarpsstöðin töluverðrar hylli. „Já, já, prinsinn að vestan hoppaði bara í viðtal og talaði um íslenska menningu og matarlyst við tvær naktar konur,“ útskýrir Örn.

Tónlistarmaðurinn segist ekki hafa verið undir neinni pressu um að koma nakinn fram. „Önnur þeirra renndi reyndar hýru auga til mín með slíka bón í huga. En ég er giftur maður með tvö börn og get ekkert verið standa í svoleiðis hlutum. Ég var líka nývaknaður og nýkominn í fötin og fannst eitthvað asnalegt að vera fara úr þeim aftur.“

Örn hefur nánast verið á stöðugu ferðalagi síðan í nóvember og spilaði nýverið á sérstökum íslenskum menningarhátíðum í Boston og Toronto. Hann kveðst hafa þyngst um sjö kíló á þessum túr, er bæði kominn með belg og alvöru túttur.

„Já, hann Þórarinn Eggertsson, matreiðslumaður af Orange, var með okkur og maturinn sem hann eldaði var bara svo girnilegur að maður var alltaf að narta eitthvað. Með þessum afleiðingum.“ - fgg