Vinna liggur niðri vegna slyssins

Öll vinna liggur enn niðri í Járnblendiverksmiðjunni á Grundartanga, eftir að starfsmaður skaðbrenndist í sprengingu í einum af þremur ofnum verksmiðjunnar á áttunda tímanum í gærkvöldi. Maðurinn varð fyrir eldtungu, sem teygði sig úr úr ofninum. Hann var fluttur með þyrlu Landhelgisgæslunnar á gjörgæsludeild Landsspítalans, þar sem honum er haldið sofandi í öndunarvél, en nánari upplýsingar um líðan hans liggja ekki fyrir.

Slökkviliðið á Akranesi var hvatt á svæðið og réði það niðurlögum elda, sem kviknuðu, og stóð brunavakt í alla nótt. Sérfræðingar í áfallahjálp voru líka kallaðir á vettvang til að sinna starfsfólki, sem var við vinnu þegar slysið varð. Lögregla og Vinnueftirlitið vinna að rannsókn á vettvangi, en sprenging varð í ofni í verksmiðjunni í apríl án þess að nokkurn starfsmann sakaði þá. Það ræðst með morgninum hvenær starfssemi hefst í verksmiðjunni að nýju.