Dómkirkjuprestur spændi upp malbikið í Frakklandi

„Þeir buðu tengdasyni mínum að koma út og prófa þessa bíla og hann mátti taka einhvern með sér. Hann bauð mér. Við vorum þarna með fólki frá Austur-Evrópu og Ísrael, tveir frá hverju landi,“ segir Hjálmar Jónsson dómkirkjuprestur. Hjálmar er þekktur fyrir að vera rólyndismaður en undir niðri kraumar bílaáhugamaður svo um munar. Hann komst því í hálfgert himnaríki þegar umræddur tendgasonur hans, Ólafur Björn Ólafsson, bauð honum að koma með sér til Frakklands og prufukeyra nýjustu týpuna af Benz.

Hjálmar segir það hafa verið ótrúlegt að fá tækifæri til að prófa svona tæki. Enda ekki á hverjum degi sem presti í miðborg Reykjavíkur býðst slíkt. „Nei, ætli þeir hafi ekki orðið uppiskroppa með útrásarvíkinga í þetta,“ skýtur Hjálmar að og hlær. Bíllinn sem dómkirkjupresturinn fékk að prófa heitir Mercedes Benz-AMG SLS 600. Hvorki meira né minna. Bíllinn er feikilega kraftmikill, fer auðveldlega yfir 200 kílómetra hraða og er glæsileg hönnun eins og sjá má á heimasíðunni mercedes-amg.com. Að sögn Hjálmars gerist það heldur ekki oft að prestur komi í slíkan reynsluakstur. „En þeir höfðu bara virkilega gaman af því.“ Og þegar presturinn settist upp í bílinn og keyrði nokkra hringi á sérstakri kappakstursbraut með þaulþjálfuðum reynslubílstjóra áttaði hann sig á því hvers konar öfl væru hér að verki. „Maður sá þá hvað mátti bjóða bílnum, hann fór vel yfir 230 kílómetra hraða og þetta var bara eins og sitja í kappakstursbíl,“ útskýrir Hjálmar.

Og hann fékk að sjálfsögðu að taka í bílinn sjálfur og sú ökuferð var víst engu lík. Hjálmari leið eins og í flugtaki og fljótlega áttaði hann sig á því hversu hraðskreiðir þessir bílar væru. Prestur ætlaði sér ekki að vera neinn eftirbátur reynsluökumannsins heldur leyfði vélinni að mala á akstursbrautinni. „Ég hef alltaf haft gaman af því að keyra, keyrði mikið þegar ég var í prestsskapnum fyrir norðan og hef alltaf verið með mikla bíladellu. Þetta var því algjörlega einstök lífsreynsla fyrir mig.“

freyrgigja@frettabladid.is