Mikið framboð á verslunarhúsnæði í kreppunni

Fermetrafjöldi verslunarhúsnæði á höfuðborgarsvæðinu hefur aukist töluvert frá því að kreppan braust út. Á síðasta ári jókst fermetrafjöldi verslunarhúsnæðis á höfuðborgarsvæðinu um 7,9% en heildarfermetrafjöldi verslunarhúsnæðis á höfuðborgarsvæðinu er nú 816.408 fm. eða sem nemur 4 fm. á hvern íbúa.

Þetta kemur fram í Morgunkorni greiningar Íslandsbank þar sem fjallað er um upplýsingar úr Árbók verslunarinnar sem Rannsóknarsetur verslunarinnar hefur birt.

Í Morgunkorninu segir að athyglisvert er hversu mikið verslunarhúsnæði hefur aukist á sama tíma og hagkerfið er að ganga í gegnum djúpa kreppu og mikill samdráttur hefur orðið í verslun.

Í Reykjavík einni saman jókst verslunarrými um 42.314 fm. árið 2008 en það ár opnaði Korputorg m.a. Árið 2009 jókst verslunarrými svo um 56.859 fm. til viðbótar í Reykjavík. Ástæðan er eflaust að stórum hluta sú að ákvarðanir um þessar byggingar voru margar hverjar teknar fyrir hrun.

Í árskýrslunni kemur fram að á tíu ára tímabili 1999-2009 hefur fermetrafjöldi verslunarhúsnæðis á landinu öllu aukist um 71,8%. Verslunarrými á höfuðborgarsvæðinu eingöngu hefur aukist meira á sama tímabili eða um 78,3%.

Í lok árs 2009 voru 204.156 fm. verslunar og skrifstofuhúsnæðis í byggingu eða hafði verið veitt byggingarleyfi á höfuðborgarsvæðinu. Í skýrslunni segir að töluvert hafi verið um að hafnar hafi verið byggingaframkvæmdir á verslunarhúsnæði fyrir kreppu og að þeim hafi enn ekki verið lokið.

Líkt og á íbúðamarkaði hefur velta á markaði með verslunarhúsnæði dregist mjög mikið saman frá því sem áður var fyrir kreppu. Á síðasta ári voru gerðir 14 kaupsamningar um verslunarhúsnæði allt árið en árið 2007 voru þeir 89 talsins. Samdrátturinn nemur um það bil 85% sem er meiri samdráttur í veltu heldur en sjá má á íbúðamarkaði fyrir sama tímabil.

Með tilliti til þess hversu mikið veltan hefur dregist saman og hversu mikið framboð af verslunarhúsnæði er þá er það athyglisvert að verðið hafi lækkað tiltölulega lítið. Eins og fram kemur í Árbókinni var árið 2007 meðalverð á hvern fermetra íbúðahúsnæðis á höfuðborgarsvæðinu 219.993 kr. og utan höfuðborgarsvæðisins 96.412 kr. Tveimur árum síðar er verðið á höfuðborgarsvæðinu 212.643 kr. og utan höfuðborgarinnar 70.905 kr.