Ánægð með ímyndina

Victoria Beckham kveðst ánægð með ímynd sína og er alveg sama þótt sumir haldi að hún sé leiðindabykkja, eins og hún orðar það sjálf í samtali við breska Cosmopolitan. Þessum fyrrverandi liðsmanni Spice Girls hefur tekist hvað best að viðhalda frægð sinni af stúlkunum í stúlknasveitinni og þykir mikil tísku­gyðja. Hins vegar virðast alltaf nokkrir hafa horn í síðu hennar og telja hana vera fúllynda kerlingu. „Þegar maður er búinn að vera svona lengi í kastljósinu þá verður manni alveg sama hvað fólki finnst. Ég lít alltaf út fyrir að vera einhver herfa á myndunum og það er bara fínt.“

Victoria segir hins vegar að strákarnir hennar og Davids Beckham séu mjög meðvitaðir um tísku. „Cruz finnst mjög gaman að fikta með hárið á sér. Við vildum krúnuraka hann einu sinni en hann vildi hanakamb. Romeo er mjög hrifinn af fötunum sínum. Það er kannski helst Brooklyn sem stendur á sama.“