Verkefnaskorturinn alvarlegur

Verkefnaskorturinn í verktakaiðnaði er orðinn það alvarlegur að hætta er á því íslenskir verktakar verði svo veikburða að erlendir verktakar muni einir hafa burðir til að taka að sér stórverk á Íslandi á næstu árum.

Eins og margoft hefur komið fram í fréttum verkefnaskortur að gera útaf við flesta verktaka. Nú síðast sagði Ístak upp um 50 starfsmönnum. Eina stóra útboðið við sjóndeildarhringinn er Búðarháls en verktakar og forsvarsmenn þeirra segja að meira þurfi til frá hinu opinbera til að koma í veg fyrir að niðursveiflan verði það djúp að ekki verði aftur snúið.

Um 17 þúsund manns unnu við mannvirkjaframkvæmdir þegar mest var hér á landi. Að meðaltali hafa hins vegar um 12-13 þúsund manns unnið í þessum iðnaði en nú eru þetta ekki nema rúmlega 2000 manns.

„Við aðstæður sem þessar þá er það hlutverk hins opinbera að auka fjárfestingar til að tryggja að atvinnugrein eins og þessi leggist hreinlega ekki af," segir Árni Jóhannsson, forstöðumaður mannvirkjasviðs Samtaka iðnaðarins.

„Það er hræðilegt að hugsa þá hugsun til enda að þessi atvinnugrein leggist af og að við þurfum að flytja inn allt í tengslum við stóriðju, vegagerð og byggingarstarfsemi. Það fer að styttast í það," segir Árni.