Hékk utan í þyrlu og bjargaði tækjum frá Veðurstofunni úr flóðinu

Haraldur Ási Lárusson tökumaður hjá Kukli fór í ævintýralega þyrluferð í dag þegar hann var að mynda hamfarirnar í Markarfljóti.

Á leiðinni til baka kom Haraldur auga á gulan kassa sem lá í aurnum sem rann niður árfarveginn. Hann beið ekki boðanna heldur skellti sér út og kippti kassanum upp á meðan hann hékk í þyrlunni sem sveif rétt yfir eðjuflaumnum.

"Þetta var svakalegt," segir Haraldur sem líkt og áhættuleikari í Hollywood fiskaði gulan kassan upp úr aurnum. Haraldur segist ekki hafa verið í mikilli hættu en kassinn innihélt GPS mælitæki frá Veðurstofunni.

Haft var samband við Veðurstofuna sem var fundinum fegin og hugðist láta sækja tækið eins fljótt og auðið er.