„Ég á ekki orð yfir þessum fjölda“

„Ég er alveg alsæl og við erum það allar í skottunum," segir Bryndís Bjarnarson, framkvæmdastjóri Kvennafrídagsins 2010. Hún segist reikna með því að um 80 þúsund konur hafi safnast saman í dag um land allt.

„Samtaða kvenna á Íslandi er alveg einstök. Það gekk allt rosalega vel þrátt fyrir veður, halarófan frá Hallgrímskirkjutorgi niður að Arnarhóli var ótrúleg, það tók 45 mínútur að komast niður eftir."

Hún segir að þrátt fyrir að veðrið hafi ekki verið gott þá eigi hún ekki orð yfir þeim fjölda sem lagði leið sína í miðbæinn í gær. „Við áttum von á þessum fjölda í bæinn án þess að veðrið myndi setja strik í reikninginn, ég veit ekki hvernig þetta hefði verið ef veðrið hefði verið í eins og til dæmis í gær, ég á ekki orð yfir þessum fjölda."

Umboðskona Sameinuðu þjóðanna í ofbeldismálum, Rashida Manjoo, var með þeim á sviðinu í dag og segir Bryndís að það hafi mikið að segja að fá sérfræðing í ofbeldismálum með sér í lið.

„Lögreglan sagði að það væru um 50 þúsund manns í miðbæ Reykjavíkur en þá voru ekki allir komnir. Ég giska á 80 þúsund manns um allt landi hafi tekið þátt í kvennafrídeginum," segir Bryndís og tekur fram að á Austfjörðum hafi rúta keyrt á milli vinnustaða þar sem konur hafi verið sóttar.