Mesti samdrátturinn í Evrópu er hér

Landsframleiðsla jókst um 0,2 prósent að meðaltali hjá aðildarríkjum Evrópusambandsins (ESB) á fyrsta fjórðungi ársins og mælist hagvöxtur þar nú 0,5 prósent á ársgrundvelli.

Hagvöxtur jókst jafn mikið innan evrusvæðisins á sama tíma. Hagvöxtur var 0,1 prósentustigi meiri á ársgrundvelli. Framkvæmdastjórn ESB býst við 0,9 prósenta hagvexti á evrusvæðinu í ár eftir 2,1 prósent samdrátt í fyrra.

Þetta er á meðal þess sem fram kemur í endurskoðuðum gögnum Eurostat, hagstofu ESB, sem birt voru á miðvikudag. Greiningar-aðilar í Evrópu segja niðurstöðurnar í samræmi við væntingar.

Til samanburðar jókst landsframleiðsla hér um 0,6 prósent á milli ársfjórðunga.

Þeir hagfræðingar sem Fréttablaðið hefur rætt við benda á að meiri sveiflur séu í íslensku hagkerfi en evrópsku og því séu ársfjórðungstölurnar ekki samanburðarhæfar. Það ætti þó að segja eitthvað um stöðu landsins í alþjóðlegu samhengi að hagkerfið hefur dregist saman um 6,5 prósent á ársgrundvell.

Aðrar eins tölur sjást ekki á meginlandi Evrópu um þessar mundir, ekki einu sinni hjá verst settu löndunum nú um stundir, svo sem í Grikklandi, Spáni og Portúgal.

amkvæmt gögnum hagstofunnar var hagvöxtur mestur á Írlandi miðað við ársfjórðunginn á undan, eða um 2,7 prósent. Hagvöxtur þar í landi er enn neikvæður um 0,6 prósent. Þá var 1,1 prósenta hagvöxtur á milli fjórðunga í Portúgal. Athygli vekur að Portúgal, sem flokkast til þeirra landa sem glíma við einhverja mestu fjárhagserfiðleikana innan ESB nú um stundir, flaggar 1,8 prósenta hagvexti á ársgrundvelli.

Mesta niðursveiflan á milli fjórðunga var í Litháen og Eistlandi en bæði löndin glíma við mikla fjárhagserfiðleika. Hagkerfi Litháens dróst saman um 3,9 prósent en hagkerfi Eistlands um tvö prósent.

Eystrasaltsríkin eru nú að snúa við úr afar djúpri lægð. Howard Archer, aðalhagfræðingur hjá evrópska greiningarfyrirtækinu IHS Insight, segir í samtali við fréttastofu Reuters nýjustu hagtölur í Evrópu geta villt mönnum sýn. Líkt og hér skýrir bætt birgðastaða viðsnúninginn að nokkru leyti. Líf hafi ekki færst í fjárfestingar, einkaneysla ekki tekið við sér líkt og vonast hafi verið til og útflutningur sé undir væntingum.

Þrátt fyrir mikið atvinnuleysi á evrusvæðinu og snarpan niðurskurð í opinbera geiranum á efnahagssvæðinu býst Archer þó við bata síðar á árinu. jonab@frettabladid.is