Vill lýsa yfir van­trausti á stjórnar­mann vegna sau­tján ára tölvubréfs

Klukkan 16 í dag hefst fyrsti hluthafafundur Íslandsbanka eftir að ríkið seldi allan hlut sinn í bankanum. Hluthafafundurinn verður haldinn í höfuðstöðvum bankans að Hagasmára í Kópavogi. Þó að höfuðstöðvar bankans séu rúmgóðar verður að teljast harla ólíklegt að allir ríflega þrjátíu þúsund hluthafar bankans geti mætt á fundinn í eigin persónu.

Atkvæðagreiðsla á fundinum mun alfarið fara fram rafrænt, óháð því hvort hluthafar mæti á fundarstað eða taki þátt rafrænt, sagði í tilkynningu um fundinn þegar boðað var til hans.

Fundurinn fer fram á íslensku, en boðið verður upp á túlkaþjónustu á ensku. Í tilkynningunni er enn fremur tekið fram að öllum hluthöfum sé heimilt að sækja hluthafafund, taka þar til máls og neyta atkvæðisréttar síns.

Kaupaukakerfi rætt 

Á fundinum verður aðalumræðuefnið tillaga stjórnar að breytingum á starfskjarastefnu bankans. Stjórn bankans leggur til að við starfskjarastefnu bankans bætist tvö heimildarákvæði við stefnuna, sem stjórn geti nýtt kjósi hún svo. 

Annars vegar verði stjórn heimilt að setja á fót sérstakt kaupaukakerfi fyrir starfsfólk og hins vegar verði stjórn heimilt að innleiða kaupréttaráætlun á grundvelli laga um tekjuskatt.

„Markmiðið með umræddum heimildarákvæðum er að veita stjórn svigrúm til þess að umbuna starfsfólki fyrir árangur í starfi og tengja saman langtímahagsmuni starfsfólks og bankans,“ segir í fundargögnum.

Önnur mál og tillaga Vilhjálms

Annað er ekki á dagskrá nema umræða um önnur mál. Þar er þegar komið eitt annað mál á dagskrá. Það er ályktunartillaga um vantraust á hendur stjórnarmanni frá Vilhjálmi Bjarnasyni, einum þekktasta fjárfesti landsins.

„Hluthafafundur í Íslandsbanka hf. haldin þann 30. júní 2025 telur stjórnarmanninn Stefán Sigurðsson með öllu óhæfan til að gæta hagsmuna hluthafa. Framganga hans við að niðurlægja og lítilsvirða hluthafa á aðalfundi í Glitni hf. vorið 2008 bendir eindregið til að störf í stjórn hlutafélags í eigu almennings og lífeyrissjóða hentar umræddum stjórnarmanni alls ekki. Hluthafafundur í Íslandsbanka hf. krefst þess að ferill stjórnarmanna í félaginu sé hafinn yfir allan vafa hvað heilindi varðar,“ segir í tillögu Vilhjálms.

Vísar í rannsóknarskýrsluna

Í fundargögnum segir að neðangreind úrklippa úr skýrslu Rannsóknarnefndar Alþingis sé birt með tillögunni til skýringar, að beiðni Vilhjálms:

„Titringur virðist hafa verið innan Glitnis fyrir aðalfund bankans 20. febrúar 2008, en þar ætlaði Vilhjálmur Bjarnason að gera athugasemdir við starfslokasamning sem gerður var við Bjarna Ármannsson 2007. Einkum hugðist hann gagnrýna kaup bankans á hlutabréfum í Glitni af Bjarna. Starfsmaður Glitnis skrifar í tölvubréfi: „Hugmyndin er að leggja fram yfirlýsingu á fundinum á morgun sem svarar spurningum Vilhjálms Bjarnasonar. Þetta mun gera Vilhjálmi erfiðara fyrir að stela senunni á fundinum og koma aðalatriðum málsins til fjölmiðla.“ Í öðru tölvubréfi frá sama starfsmanni sama dag segir: „Ég held að við ættum ekki að gefa Vilhjálmi of mikinn tíma á fundinum til þess að undirbúa svör við svarinu. Þannig að mínu mati ætti þetta ekki að koma við upphaf fundarins.“ Tölvubréf frá Stefáni Sigurðssyni til nokkurra stjórnenda og starfsmanna Glitnis 20. febrúar 2008 RNA 8. Bindi bls. 221“