Sirkus Tigers Woods hefst í dag

Kylfingurinn Tiger Woods slær sitt fyrsta golfhögg í fimm mánuði klukkan 17.42 að íslenskum tíma á Augusta-vellinum í Georgíu-ríki þegar US Masters í golfi hefst í dag. Búist er við miklum fjölmiðlasirkus í kringum kylfinginn þá fjóra daga sem mótið stendur.

Tiger Woods er einn frægasti einstaklingur í heimi. Og eftir að upp komst um framhjáhald hans hefur Tiger verið í fréttum fyrir allt annað en golf. Nú hillir hins vegar undir lok þessa tímabils í lífi hans þegar hann mætir til leiks á Masters-mótinu sem er eitt af fjórum stóru mótunum á mótaröðinni í golfi.

Fjölmiðlafárið í kringum Tiger hófst raunar á þriðjudaginn þegar hann hélt fjörutíu mínútna langan blaðamannafund. Mótshaldarar höfðu síðan gert ráðstafanir til að vernda Tiger frá utanaðkomandi áreiti en teyminu í kringum kylfinginn fannst það greinilega ekki nóg því þeir réðu sérstaka lífverði sem munu hafa augu og eyru með áhorfendum. Samkvæmt breska blaðinu The Sun fengu þeir myndir í sínar hendur af meintum ástkonum Tigers og einn þeirra ku víst hafa áreitt „óbreyttan" kvenkyns aðdáanda vegna gruns um að þarna væri klámmyndaleikkonan Joslyn James mætt. Svo reyndist þó ekki vera.

Blaðamenn biðu síðan spenntir eftir því á þriðjudaginn þegar tilkynnt var um hvernig rásröðin yrði. Vafalítið kom það engum á óvart að Tiger mun hefja leik á besta sjónvarpstíma þar vestra, eða klukkan 13.42. Þar sem fjögurra tíma mismunur er á Georgíu og Íslandi munu íslenskir golfaðdáendur að öllum líkindum sjá síðustu holurnar hjá kylfingnum en útsending á Stöð 2 Sport hefst klukkan níu í kvöld. Á morgun verður Tiger hins vegar ekkert í mynd þar sem hann á rástíma snemma um morguninn. freyrgigja@frettabladid.is