Bachelorette til Íslands

Einn þáttur úr bandarísku raunveruleikaþáttaseríunni Bachelorette verður tekinn upp hér á landi innan tíðar. Samkvæmt heimildum Fréttablaðsins mun framleiðslufyrirtækið Pegasus þjónusta bandaríska tökuliðið meðan á dvöl þess hér á landi stendur, en um er að ræða gríðarlega stórt verkefni sem tugir manna munu koma að.

Eftir því sem Fréttablaðið kemst næst hafa Bandaríkjamennirnir hug á því að taka upp rómantískar senur með þátttakendum víðs vegar um landið og því ljóst að um verður að ræða mikla landkynningu, sennilega á pari við þá sem Amazing Race hafði árið 2004 þegar þátturinn var tekinn upp hér á landi. Um það bil þrettán milljónir Bandaríkjamanna horfa á hvern þátt Bachelorette.

Þegar Fréttablaðið hafði samband við Pegasus var engin svör að fá varðandi þetta verkefni. Eftir því sem Fréttablaðið kemst næst hvílir mikil leynd yfir tökunum og verður öllum sem að þeim koma gert að skrifa undir sérstakt trúnaðarskjal enda má ekkert kvisast út hvaða heppnu piparsveinar fá að koma til Íslands og hverjir verða dottnir úr leik á þessum tímapunkti.

Ólöf Ýrr Atladóttir ferðamálastjóri segir að mikil landkynning fyrir Ísland felist í því að vinsæll þáttur sem þessi sé tekinn upp hér.

„Áhorfendahópurinn að þætti á borð við þennan er einmitt sá hópur frá Norður-Ameríku sem lítur hýru auga til Íslands," segir Ólöf en það eru vel menntaðar konur á aldrinum 18-35 með góðar tekjur.

„Það að svona þáttur skuli horfa til Íslands getur því bara verið jákvætt. Við höfum séð þessi dæmi að bæði Bachelor og Bachelorette hafa haft áhrif á ferðaþjónustu víða um heim," segir Ólöf og bendir meðal annars á tölur frá Nýja-Sjálandi.

Þar fjölgaði heimsóknum á heimasíðu Ferðamálastofu Nýja-Sjálands um 110 prósent eftir að þáttur sem tekinn var þar upp var sýndur.

Fyrir aðdáendur þessara vinsælu stefnumótaþátta er rétt að kynna til leiks stúlkuna sem leitar að ástinni á Íslandi. Hún heitir Ali Fedotowsky og var ein aðalstjarnan í síðustu Bachelor-þáttaröðinni.

Fram kemur á heimasíðu ABC-sjónvarpsstöðvarinnar að hún sé mikil framakona en hafi jafnframt áhuga á knattspyrnu og útivist, eitthvað sem ætti að nýtast henni vel þegar hún kemur til Íslands og kynnir sér náttúru Íslands.

Á heimasíðunni kemur jafnframt fram að fyrsti þátturinn verði frumsýndur mánudaginn 24. maí.

freyrgigja@frettabladid.is