Andstæðingur dagsins á EM: Danmörk

Vísir fjallar um andstæðinga Íslands í riðlakeppni Evrópumeistaramótsins í handbolta. Í dag mætir Ísland liði Danmerkur í þriðju og síðustu umferð riðlakeppninnar. Leikurinn hefst klukkan 19.15 í dag.

Hér fyrir neðan gefur að líta yfirlit yfir árangur liðsins á stórmótum í handbolta undanfarinn áratug. Þá er einnig rætt við Guðmund Guðmundsson landsliðsþjálfara um hans álit á andstæðingi dagsins, lykilmanni þess, þjálfara og hvað beri sérstaklega að varast.

„Miðað við það sem ég hef séð til Dana þá eru þeir að spila mun fjölbreytilegri varnarleik en áður. Bæði 6-0 og 5-0 en einnig 5+1," sagði Guðmundur en það skal tekið fram að viðtalið var tekið áður en EM í Austurríki hófst.

„Ég tel mig vita að vissu leyti af hverju þeir eru að spila svo fjölbreyttan varnarleik en ég tel að þeir geti ekki stillt upp jafn sterkri 6-0 vörn og oft áður. En það getur líka vel verið að þeir vilja reyna önnur varnarafbrigði með því að vera einfaldlega óútreiknanlegir og að þeir vilji koma á óvart. Það er erfitt að meta það."

„Þar að auki hafa Danir alltaf verið góðir í sókn og eru enn. Þeir eru með frábæra hornamenn og frábæran línumann. Þetta er mjög öflugt lið í alla staði enda ekki langt síðan það varð Evrópumeistari."

Árangur undanfarinna tíu ára:

EM 2000: 10. sæti

ÓL 2000: Komust ekki á leikana.

HM 2001: Komust ekki í úrslitakeppnina.

EM 2002: 3. sæti

HM 2003: 9. sæti

EM 2004: 3. sæti

ÓL 2004: Komust ekki í úrslitakeppnina.

HM 2005: 13. sæti

EM 2006: 3. sæti

HM 2007: 3. sæti

OL 2008: 7. sæti

EM 2008: 1. sæti

HM 2009: 4. sæti

Innbyrðisviðureignir Íslands og Danmerkur á stórmótum síðasta áratug:

EM 2000: Ísland - Danmörk 24-26

- í riðlakeppni

EM 2002: Ísland - Danmörk 22-29

- í leik um 3. sæti

EM 2006: Ísland - Danmörk 28-28

- í riðlakeppni

HM 2007: Ísland - Danmörk 41-42

- eftir framlengingu í 8-liða úrslitum

ÓL 2008: Ísland - Danmörk 32-32

- í milliriðlakeppni

Þjálfari: Ulrik Wilbek.

Guðmundur um Wilbek:

„Hann er frábær þjálfari sem hefur náð stórkostlegum árangri. Það er enginn vafi um það hversu hæfur hann er."

Lykilmaður: Michael Knudsen, Flensburg.

„Danir eru með afar öflugt lið en ég tel sérstaklega mikilvægt fyrir þá að vera með línumanninn Knudsen í góðu formi. hann er gríðarlega öflugur í sínu hlutverki auk þess sem hann er sterkur varnarmaður," segir Guðmundur.

Hvað ber að varast:

„Fyrst og fremst öflugan sóknarleik sem og hraðaupphlaupin sem er afar sterkt vopn hjá þeim. Við þurfum einnig að halda vöku okkar gagnvart varnarleiknum þeirra," segir Guðmundur.