Segjast ekki hafa heimilað samþjöppun á matvörumarkaði

Samkeppniseftirlitið segist alls ekki hafa heimilað samþjöppun á matvörumarkaði.

Í pistli sem birtur er á vefsíðu Samkeppniseftirlitsins segir að samkeppnisyfirvöld hafi ekki haft neinar lagalegar forsendur til að koma í veg fyrir samruna Baugs, sem nú heiti Hagar, og 10-11 verslananna. Þá hafi samruni Hagkaupa og Bónusar, í skilningi samkeppnislaga, átt sér stað í nóvember 1992. Samkeppnislög hafi hins vegar tekið gildi 1. mars 1993.

Samkeppniseftirlitið segir tilefni þessa skrifa vera það að í opinberri umfjöllun um matvörumarkaði, nú og á fyrri tíð, hafi því ítrekað verið haldið fram að samkeppnisyfirvöld hafi heimilað samþjöppun í smásölu matvara, nú síðast í tengslum við umræður um breytingar á mjólkurmarkaði. Þannig hafi samkeppnisyfirvöld m.a. leyft Högum að verða markaðsráðandi á þessu sviði matvörumarkaðar.