Fjöldatakmarkanir ræddar

Hátíðahöld í Vestmannaeyjum fóru almennt vel fram að mati lögreglunnar í Vestmannaeyjum. Þjóðhátíðarnefnd telur að um sextán þúsund manns hafi verið á Þjóðhátíð. „Aðsóknarmet var slegið þriðja árið í röð. Það setur sérstakan blæ á hátíðina að hún er svona fjölmenn," segir Páll Scheving, formaður Þjóðhátíðarnefndar.

„Þetta var nú allt saman frábært," segir Páll og bætir við að veðurblíða hafi gert hátíðahöldin einfaldari. „Þjóðhátíðargestir fengu skvettu framan í sig í morgun. Þá opnuðust himnarnir en þetta var ágætis ræs fyrir fólk."

Talsverður erill var þó hjá lögreglunni en yfir helgina voru samtals tólf líkamsárásir kærðar í Vestmannaeyjum en engin þeirra var alvarleg samkvæmt upplýsingum frá lögreglu.

Nokkur fíkniefnamál komu upp og í gær voru þau orðin um fjörutíu talsins. Lagt var hald á um þrjú hundruð grömm og var helmingur þess amfetamín en einnig nokkurt magn af kókaíni. Eitt af stærstu fíkniefnamálunum í Vestmannaeyjum um helgina kom upp við leit á manni á þrítugsaldri. Hann var á leið inn í Herjólfsdal þegar á honum fundust 42 grömm af amfetamíni. Hann var handtekinn og viðurkenndi við skýrslutöku að hafa ætlað að selja amfetamínið. Þá voru tveir teknir fyrir akstur undir áhrifum fíkniefna.

Páll segir þegar byrjað að huga að næstu Þjóðhátíð. „Við erum mjög hugsi yfir þessum mannfjölda. Við veltum fyrir okkur hvort við eigum að setja fjöldatakmarkanir."

Páll segir áhættu að taka á móti svo miklum mannfjölda. „Auðvitað þarf að velja. Svona fjölmenn hátíð reynir á þolinmæði og umburðarlyndi fólks. Íbúafjöldi Vestmannaeyja var fjórfaldaður um helgina og ef ég færi það yfir á Reykjavík væri það eins og þar þyrfti að koma fyrir 400.000 manns á tjaldstæðum og veita grunnþjónustu. Þetta reynir á þolrifin en hátíðin skilar verulegum ábata fyrir samfélagið og yfir helgina er hundruð milljóna króna velta í Vestmannaeyjum," segir Páll sem mun leita lausna með íbúum Eyja varðandi fjöldatakmarkanir.

martaf@frettabladid.is