Íslensk hönnun á útimarkaði í sumar

Fyrstu helgina í júlí fer af stað útimarkaður í portinu bak við danska sendiráðið á Hverfisgötunni. Markaðurinn ber nafnið Reykjavik Creative Market og mun bjóða upp á alls kyns íslenska hönnun. Markaðurinn mun vera í gangi allar helgar í júlí og ágúst, laugardaga og sunnudaga.

„Markmiðið er að að gefa íslenskum hönnuðum stað til að selja sínar vörur og kynna sitt starf. Draga saman það sem er nýtt, ferskt og áhugavert í íslenskri hönnun og vöruhönnun. Svo skapast oft svo góð stemning á útimörkuðum,“ segir Guðbjörg Jakobsdóttir fatahönnuður, ein af þeim sem stendur að þessu verkefni, en hún tók einnig þátt í að stofna PopUp-markaðina vinsælu.

„Það er svo mikið af hönnuðum sem eru með góðar vörur og hugmyndir sem leggja ekki í þá fjárfestingu að stofna fyrirtæki. Þeir fá nú tækifæri til að komast að því hvernig vörunni er tekið af kaupandanum,“ segir Guðbjörg en á markaðnum verða bæði hönnuðir að stíga sín fyrsta skref í bland við sprotafyrirtæki að stækka sinn kúnnahóp.

Guðbjörg segist vera viss um að útimarkaðir geti gengið á Íslandi þrátt fyrir óstöðugt veðurfar. „Við erum búin að vera með svo gott veður hér og ef það kemur rigning þá erum við bara viðbúin því,“ segir Guðbjörg og bætir við að portið þar sem markaðurinn verður haldinn sé svo skjólsæll að þau losni að minnsta kosti við íslenska rokið. - áp