Beint lýðræði í næstu kosningum

Í fyrsta sinn í sögunni frá því í Grikklandi hinu forna og Alþingi á landnámsöld er tæknilega hægt að koma á fullkomnasta formi lýðræðis, beinu lýðræði.

Beint lýðræði þar sem kjörgengir borgarar kjósa beint og milliliðalaust um öll mál. Lykillinn er netið, því nú er tæknilega einfalt og öruggt að kjósa um netið. Við búum við fulltrúalýðræði en það þýðir ekki að ómögulegt sé að koma á beinu lýðræði innan þess kerfis.

Það þarf nýtt framboð til þings sem vinnur í beinu lýðræði í öllum málum. Það er að segja; kjósendur framboðsins ráða hvernig þingmenn listans greiða atkvæði í einstökum málum. Hugmyndafræðin byggir á að fólki sé treystandi til að taka ákvarðanir, sem að mínu viti er margsannað mál.

Þingmenn framboðsins hafa það hlutverk að skilja og skýra málin fyrir kjósendum á vel hönnuðu vefsvæði. Þar settu þingmenn fram kosti og galla og sína afstöðu til málanna. Hvers vegna með og hvers vegna á móti. Allir geta komið fram skoðun sinni á málum á lýðræðisvefnum og skoðað málin á einfaldan og skipulegan hátt. (hönnun vefsins þarf að vera mikil snilld.) Síðan kjósa stuðningsmenn/kjósendur framboðsins rafrænt um vefinn á sama hátt og hnapparnir á borðum þingamnna, Já , nei, sit hjá og geta einnig gert grein fyrir atkvæði sínu.

Niðurstöðurnar eru bindandi fyrir þingmenn framboðsins og þeim er skylt að greiða atkvæði á þingi í samræmi við niðurstöðuna. Tökum dæmi þar sem framboðið hefur 5 þingmenn. Ef 60% kjósenda framboðsins er með ákveðnu máli 20% á móti og 20% vilja sitja hjá greiða 3 þingmenn (60% þingmanna) atkvæði með, 1 á móti (20% á) og einn situr hjá (20%. ) Réttur minnihlutans til að hafa áhrif er mikilvægur þáttur í lýðræði.

Vel mætti hugsa sér að það þyrfti ákveðna þátttöku í einstökum atkvæðagreiðslum meðal kjósenda t.d. 30% til að niðurstaðan verði bindandi. Ef þátttaka væri minni sætu þingmenn hjá eða greiddu atkvæði í samræmi við sínar skoðanir.

Prófkjör færu að sjálfsögðu fram um netið. Fólk sem hefði áhuga setti inn upplýsingar um sig inná staðlað netform sem væntanlegir kjósendur skoða og velja síðan frambjóðendur með músarsmelli.

Fáránlegt, já, nýstárlegt, já, byltingarkennt, já, gagnlegt, já, framkvæmanlegt, já.

Hver framkvæmir? Til dæmis er Hugmyndaráðuneytið kraftmikill vettvangur nýrra lausna í samfélaginu. Þar er þekking og vilji til að reyna nýjar leiðir.