Liverpool tapaði aftur

Liverpool tapaði sínum öðrum leik á tímabilinu, í þetta sinn fyrir Aston Villa á heimavelli, 3-1. Þetta var fyrsti sigur Villa á tímabilinu.

Lucas skoraði fyrsta mark leiksins með sjálfsmarki en Curtis Davies og Ashley Young skoruðu hin mörk Villa. Fernando Torres skoraði mark Liverpool.

Liverpool fékk fyrsta færi leiksins á tíundu mínútu þegar að leikmenn eiga fjórar marktilraunir í sömu sókninni en ávallt tókst gestunum að bjarga. Fyrst Steven Gerrard, svo Torres, svo Yossi Benayoun og að síðustu reyndi Gerrard skot sem varnarmönnum Villa tókst að komast í veg fyrir.

Það var svo á 34. mínútu að Villa skoraði úr sinni fyrstu hættulegu sókn í leiknum. Young gaf fyrir inn í teig úr aukaspyrnu og varð Lucas fyrir því óláni að skalla boltann í eigið mark þegar hann var að reyna að hreinsa boltann frá markinu.

Eftir þetta sóttu leikmenn Aston Villa meira og uppskáru annað mark undir lok hálfleiksins. Nicky Shorey tók hornspyrnu og rataði knötturinn á Curtis Davies sem skallaði í mark heimamanna, þó svo að tveir varnarmenn Liverpool hafi verið nálægt honum. Stuðningsmenn Liverpool voru þó óánægðir með að Villa hafi fengið hornspyrnuna, sem og Pepe Reina sem fékk gult fyrir mótmælin.

Snemma í síðari hálfleik átti Gerrard ágætt skot að marki sem Brad Friedel, markvörður Villa, varði vel. Friedel var ekki hættur og fór mikinn í markinu fyrri hlutann í síðari hálfleiknum, leikmönnum Liverpool til gremju en þeir reyndu að sækja af fremsta megni.

Það bar svo loks árangur á 72. mínútu. Emiliano Insua átti góða fyrirgjöf fyrir markið og Fernando Torres náði að klára sóknina með skoti sem hafnaði í marki gestanna.

En aðeins þremur mínútum síðar fékk Liverpool rothöggið. Steven Gerrard gerðist sekur um slæm mistök er hann braut á Nigel Reo-Coker í eigin vítateig. Young skoraði úr vítinu og innsiglaði sigur sinna manna.

Niðurstaðan fyrsti sigur Villa á tímabilinu en annað tap Liverpool í þremur fyrstu leikjum liðsins á tímabilinu. Liverpool tapaði alls tveimur leikjum allt síðasta tímabil í deildinni.