Öruggt hjá United

Manchester United er komið með fimm stiga forystu á Liverpool á toppi ensku úrvalsdeildarinnar eftir 3-0 sigur á Fulham í frestuðum leik úr þriðju umferð deildarinnar.

Þar með hafa níu efstu liðin öll leikið 25 leiki. United er með átta stiga forystu á Aston Villa sem er í þriðja sæti, tíu stiga forystu á Chelsea og fimmtán stiga forystu á Arsenal.

Þeir Paul Scholes, Dimitar Berbatov og Wayne Rooney skoruðu mörk United í kvöld en Edwin van der Sar hefur nú haldið marki sínu hreinu í 1302 mínútur. Hann bætir því enn met sitt í Englandi.

Wayne Rooney var á meðal varamanna í leiknum en þeir Nemanja Vidic, Paul Scholes og Carlos Tevez komu allir inn í byrjunarliðið eftir að hafa verið á bekknum gegn Derby í bikarnum.

Þeir Andy Johnson og Paul Konchesky voru báðir meiddir í liði Fulham og komu þeir Toni Kallio og Bobby Zamora.

Fyrsta markið kom strax á tólftu mínútu. Michael Carrick tók hornspyrnu beint á Paul Scholes sem skaut að marki af 25 metra færi. Mark Schwarzer hefði ef til vill átt að verja skotið en hann náði ekki að halda boltanum sem skoppaði yfir línuna í kjölfarið.

United var að leika glimrandi knattspyrnu í fyrri hálfleik og sást það einna best þegar að næsta mark leiksins kom. Leikmenn United héldu boltanum lengi og lauk sókninni með því að Scholes lyftir boltanum vörn Fulham á John O'Shea sem framlengdi um leið boltann á Berbatov. Hann átti í engum vandræðum með að skora.

United átti fleiri færi í fyrri hálfleik en mörkin urðu ekki fleiri.

Wayne Rooney kom svo inn á sem varamaður fyrir Berbatov á 61. mínútu og var búinn að skora þriðja og síðasta mark United tveimur mínútum síðar. Fulham náði ekki að hreinsa boltann frá marki og barst hann á Ji-Sung Park. Hann gaf boltann fyrir markið þar sem Rooney var mættur á fjærstöng og potaði boltanum í markið.

Þar með voru úrslit leiksins ráðin og bara spurning um hvort að leikmenn Fulham næðu að skora framhjá Edwin van der Sar. Það tókst ekki og hefur Hollendingurinn stóri því haldið marki United hreinu í 1302 mínútur.

Þar með er hann kominn í annað sæti á lista markvarða í evrópskum liðum. Danny Verlinden hélt marki Club Brugge hreinu í 1390 mínútur árið 1990. Van der Sar getur þar með bætt það met í næsta leik United.

Hann á þó talsvert í Mazaropi, markvörð Vasco de Gama, sem hélt marki sínu hreinu í 1816 mínútur tímabilið 1977-78. Hann er þó nú kominn í sjötta sæti heimslistans.