Segir lánshæfiseinkunnir ríkissjóðs ekki breytast í bráð

Enn ríkir mikil óvissa um þróun lánshæfismats ríkissjóðs á næstunni vegna þeirrar miklu óvissu sem hér er í efnahagsmálunum. Telur greining Íslandsbanka að lánshæfiseinkunnir ríkissjóðs komi ekki til með að taka breytingum á næstunni þrátt fyrir að þær séu á neikvæðum horfum í bókum matsfyrirtækjanna. Líklega munu matsfyrirtækin bíða og sjá hver framvinda mála verður næstu mánuði.

Fjallað er um málið í Morgunkorni greiningarinnar. Þar segir að engar breytingar hafa átt sér stað á lánshæfismati íslenska ríkissjóðsins það sem af er þessu ári, þ.e. hvorki lánshæfiseinkunnum né horfum um þær.

Fyrir langtímaskuldbindingar í erlendri mynt eru einkunnir ríkissjóðs hæstar í bókum Moody´s, þ.e. Baa1, sem er tveimur þrepum ofar en einkunnir hans, þ.e. BBB-, hjá Fitch, S&P og R&I.

Lánshæfiseinkunnir ríkissjóðs eru þær lægstu sem hann hefur haft frá upphafi. Að auki eru horfur um einkunnir neikvæðar í bókum Moody´s og S&P sem gefur til kynna að líkur eru á að þær komi til með að lækka til meðallangs tíma. Hjá Fitch eru einkunnir til athugunar með neikvæðum vísbendingum og hjá R&I er einkunnin undir eftirliti vegna hugsanlegrar lækkunar sem þýðir að breytingar á einkunnum geta átt sér stað á skemmri tíma en við á um hjá Moody´s og S&P.

Ekki hefur mikið borið á fréttatilkynningum frá matsfyrirtækjunum um stöðu ríkissjóðs á árinu. Þó sendi Moody´s nýverið frá sér tilkynningu þar sem það greindi m.a. frá því að fyrirvarar vegna Icesave samningana hefðu fremur jákvæð áhrif á lánshæfiseinkunn ríkissjóðs og taldi að breytingar í tengslum við það kæmu til með að styðja við sjálfbærni ríkisfjármála.

Ætla má að önnur matsfyrirtæki líti fyrirvaranna vegna samningana einnig jákvæðum augum og að lánshæfismat ríkissjóðs hvíli að miklu leyti á framvindu Icesave samkomulagsins og áhrifum þess, þá bæði á þjóðarbúið og orðspori Íslands á erlendri grundu. Að auki má ætla að matsfyrirtækin beini augum að því hvernig stjórnvöldum tekst til með að skapa forsendur fyrir stöðugleika krónunnar, afnema þau gjaldeyrishöft sem komið var á fyrir áramót og með að endurreisa bankakerfið.

Erlend eignaraðild bankanna mun hafa jákvæð áhrif á lánshæfismat og má því ætla að matsfyrirtækin telji það jákvætt ef skilanefndir gömlu bankanna eignist nýju bankanna að stærstum hluta, þá fyrir hönd erlenda kröfuhafa.