Afturelding tryggði sér oddaleik

Það mun ráðast í oddaleik á mánudagskvöldið hvort það verður Afturelding eða Stjarnan sem leikur í N1-deild karla á næstu leiktíð.

Liðin eigast við í hreinni úrslitarimmu um hvort liðið leikur í efstu deild á næstu leiktíð. Stjarnan vann fyrstu viðureign liðanna, 28-24, og Afturelding hafði stórsigur í kvöld, 32-22.

Leiknum var lýst beint hér á Vísi og má lesa lýsinguna hér fyrir neðan.

21.01 - Leik lokið: Afturelding - Stjarnan 32-22

Formsatriði fyrir heimamenn að klára þennan leik. Eftir að Stjarnan komst í 6-5 forystu um miðbik fyrri hálfleiks og heimamenn skoruðu þá fimm mörk í röð litu þeir aldrei um öxl. Yfirburðir heimamanna voru miklir, sérstaklega í síðari hálfleik.

Mörk Aftureldingar:

Hilmar Stefánsson 7/2

Jóhann Jóhannson 7/1

Bjarni Þórðarson 5

Þrándur Gíslason 3

Ásgeir Jónsson 2

Jón Andri Helgason 2

Attila Valaczkai 2

Reynir Ingi Árnason 1

Varin skot:

Smári Guðfinsson 15

Kristófer Guðmundsson 1/1

Mörk Stjörnunnar:

Björgvin Hólmgeirsson 10

Daníel Einarsson 5

Fannar Þorbjörnsson 2

Guðni Már Kristinsson 2

Jón Heiðar Gunnarsson 1

Kristján Kristjánsson 1

Guðmundur Guðmundsson 1

Varin skot:

Þorgils Orri Jónsson 6

Roland Eradze 2



56. mínúta: Afturelding - Stjarnan 29-19

Heimamenn eru að klára þetta. Tvö hraðaupphlaupsmörk í röð og munurinn orðinn tíu mörk.



50. mínúta: Afturelding - Stjarnan 25-17

Seiglan í liði Aftureldingar er gríðarlega mikil. Það er sama hvað Stjörnumenn reyna að koma sér aftur inn í leikinn, þeir rauðklæddu viðrast alltaf eiga svar.

45. mínúta: Afturelding - Stjarnan 22-15

Þetta er ekki búið enn. Stjörnumenn neita að játa sig sigraða og hafa gefið í í sóknarleiknum. Björgvin Björgvinsson fer þar mikinn sem fyrr og hefur skorað átta mörk til þessa í leiknum.

41. mínúta: Afturelding - Stjarnan 20-12

Smári Guðfinsson var að verja sitt tíunda skot fyrir Aftureldingu. Hann hefur verið gríðarlega öflugur í kvöld.

37. mínúta: Afturelding - Stjarnan 20-10

Gestirnir taka leikhlé enda eru Mosfellingar að slátra þeim hér í upphafi síðari hálfleiks. Varnarleikur Stjörnunnar er horfinn.



35. mínúta: Afturelding - Stjarnan 18-9

Fjögur mörk hjá Aftureldingu í röð í upphafi síðari hálfleiks. Þvílík keyrsla á Mosfellingum.

20.11 - Hálfleikur: Afturelding - Stjarnan 14-9

Heimamenn hafa náð sér virkilega vel á strik, sérstaklega í síðari hluta hálfleiksins. Vörn og markvarsla hefur verið í ágætu lagi. Gestirnir úr Garðabænum hafa lagað sóknarleikinn eitthvað eftir því sem á hefur liðið. Enn fimm marka sanngjörn forysta heimamanna í hálfleik.

27. mínúta: Afturelding - Stjarnan 11-8

Stjörnumenn skoruðu tvö í röð en heimamenn náðu að svara og endurheimta þriggja marka forystu.

23. mínúta: Afturelding - Stjarnan 10-6

Jóhann Jóhannsson hefur skorað þrjú af síðustu fimm mörkum Aftureldingar af mikilli seiglu og eru heimamenn komnir í fjögurramarka forystu.



22. mínúta: Afturelding - Stjarnan 7-6

Stjörnumenn komust yfir, 6-5, en þá kom ekkert mark í fimm mínútur. Heimamenn hafa verið öflugir í vörninni og uppskáru eftir því og hafa endurheimt forystuna.



16. mínúta: Afturelding - Stjarnan 5-5

Stjörnumenn eru greinilega vaknaðir til lífsins og búnir að hrista af sér slenið frá því í byrjun leiks. Þeir skora þrjú mörk gegn einu og jafna metin, 5-5. Björgvin skoraði fyrstu fjögur mörk Stjörnunnar.

12. mínúta: Afturelding - Stjarnan 4-2

Stjarnan var tæpar tólf mínútur að skora annað mark sitt í leiknum en ekkert hefur gengið í sóknnni. Björgvin var aftur þar að verki og hefur hann því skorað bæði mörk gestanna. Það er enn gríðarmikil stemning í húsinu og nánast öll á bandi heimamanna.

8. mínúta: Afturelding - Stjarnan 3-1

Ekkert var skorað í fimm mínútur þar til að Hilmar Stefánsson skoraði með góðu langskoti fyrir heimamenn. Ekkert gengur hjá gestunum í sókninni.

3. mínúta: Afturelding - Stjarnan 2-1

Leikurinn hefst með miklum látum og komust heimamenn í 2-0. Björgvin Björgvinsson svaraði með neglu.

19.25 Gamlar hetjur

Hér voru boðnir velkomnir þeir leikmenn Aftureldingar sem mættu Stjörnunni í úrslitakeppni í sæti í gömlu 2. deildinni árið 1979. Þeir voru sæmdir heiðursmerki félagsins. Afturelding vann þá Stjörnuna í þeirri rimmu.

19.15 Velkomin til leiks!

Vísir heilsar hér úr Mosfellsbæ þar sem leikur Stjörnunnar og Aftureldingar fer senn að hefjast. Leikurinn fer fram í gamla íþróttahúsinu og er stemningin á pöllunum hreint ótrúleg! Stuðningsmenn Aftureldingar eru margir og láta vel í sér heyra. Syngja söngva og tralla.

Stemningin gefur þeirri sem ríkti hér í þessu húsi á gullaldartímabili Aftureldingar fyrir áratug eða svo nákvæmlega ekkert eftir.