Jón Ólafs á slóðum Villa í Lúxemborg

„Ég var þarna fyrir tveimur vikum, drakk í mig umhverfið og stemninguna, svona þrjátíu til fjörutíu árum seinna,“ segir Jón Ólafsson, tónlistarmaður með meiru. Hann var nýverið í smáríkinu Lúxemborg, á slóðum Vilhjálms Vilhjálmssonar, einhvers ástsælasta söngvara íslensku þjóðarinnar.

Fréttablaðið greindi frá því fyrir margt löngu að Jón hefði verið fenginn til að skrifa ævisögu Vilhjálms og síðan í febrúar hefur hann eiginlega verið á útopnu að viða að sér heimildum. Hann er nú loks byrjaður að skrifa enda er stefnt að því að gefa bókina út fyrir jól. „Ég held að ég hafi örugglega talað við vel yfir hundrað manns. Sennilega gæti ég talað við fólk sem kannaðist við Vilhjálm til æviloka en þá kæmi þessi bók aldrei út.“

Jón segir Vilhjálm hafi kynnst gríðarlegum fjölda fólks, hann hafi víða sáð fræjum og haft mikil áhrif á fólk. „Og auðvitað hefur sitthvað komið upp úr dúrnum sem ég vissi ekki. Vilhjálmur var auðvitað bara manneskja, breysk eins og við hin og það skiptust svo sannarlega á skin og skúrir í hans lífi,“ segir Jón, sem bjóst ekki við því að heimildarvinnan yrði jafn viðamikil og raun ber vitni. „Nei, það er alveg á hreinu. Bara að ná í skottið á öllum þessum flugmönnum sem þekktu Vilhjálm getur verið þrautin þyngri.

Mennirnir eru auðvitað minnst heima hjá sér. Ég verð að sæta færis þegar þeir eru í landi því fyrr en varir eru þeir horfnir til Hong Kong eða þaðan af lengra.“ Jón segir að bókin eigi eftir að koma á óvart, margt hafi aldrei komið upp á yfirborðið og þá prýði bókina myndir sem aldrei hafi áður birst á prenti.