Hugleikur grætur Dr. Jón

Dr. Jón er fyrirmyndin að eineygða kettinum Kisa sem er sköpunarverk Hugleiks. Dr. Jón er að öllum líkindum frægasti köttur landsins, lifði litríku lífi og náði því sem fáum mennskum tekst: Að knésetja heimskt kerfið.

„Já, Dr. Jón er dáinn. Dauður? Ég hef aldrei náð því af hverju við eigum að hafa einhver öðruvísi orð yfir þetta nákvæmlega sama ástand þegar mannfólkið á í hlut,“ segir Hugleikur Dagsson rithöfundur þegar honum er bent á að oftast sé talað um að dýr drepist en ekki að þau deyi.

Einn frægasti köttur landsins er… dáinn. Dr. Jón var Hugleiki sem Eiríkur á Brúnum Halldóri þegar hann skrifaði sögu Steinars Steinssonar í Paradísarheimt. Dr. Jón var sem sagt fyrirmyndin að eineygða kettinum Kisa sem Hugleikur hefur fjallað um í máli og myndum. „Ég fattaði ekki fyrr en ég var hálfnaður með sex síðna myndasögu um Kisa að ég var að byggja á ketti sem ég þekkti. Hann hafði smogið inn í undirmeðvitund mína,“ segir Hugleikur. Eða þekkti og þekkti. Dr. Jón leyfði Hugleiki ekki að kynnast sér neitt að ráði. Fór sínar eigin leiðir og það líkar Hugleiki vel. „Hann kláraði öll sín níu líf. Hann var mikið að djamma á miðjum aldri, en í mannsárum hefur hann náð því að verða áttatíu ára, en hann var eitt sinn að elta á sér typpið eins og kettir gera, varð fyrir bíl og missti augað,“ segir Hugleikur, sem reyndar telur rétt að frændi hans og eigandi Dr. Jóns, Guðlaugur Jón Árnason íslenskufræðingur, sé til svara en hann var yfirlýstur eigandi kattarins.

„Hann hefur verið um sextán ára. En þetta var litríkur köttur. Og til er nokkuð stór mappa um hann því Dr. Jón kom margoft við sögu í fjölmiðlum og Sigmund teiknaði eitt sinn mynd af honum,“ segir Guðlaugur sem upplýsir að Dr. Jón hafi heitið fullu nafni Dr. Jón Karl Friðrik Geirsson Arnested í höfuðið á efnafræðiprófessor við Háskóla Íslands. En sá var eigandi móður Dr. Jóns.

Ástæðan fyrir því að Dr. Jón var svo mjög til umfjöllunar í fjölmiðlum var sú að hann lenti í aðalhlutverki þegar borgin fór í eina af sínum umdeildustu herferðum. „Einhverja þá heimskulegustu og er þá langt til jafnað,“ segir Hugleikur. En þá tók borgin fullt tillit til kvartana húsmæðra í vesturbænum sem kvörtuðu undan heimsóknum katta í garða, eins og kettir gera, og voru settar upp villikattagildrur.

En einu fórnarlömb voru heimiliskettir og fyrstur til að lenda í gildru var Dr. Jón. Eigandi hans rak augun í hann í sjónvarpinu og leysti hann út fyrir fúlgu fjár. Dr. Jón átti eftir að lenda þrisvar í villikattagildrunum sem varð til þess að fjölmiðlar fóru að veita þessum ketti athygli og svo fór að endingu að borgin féll frá þessum aðgerðum. Þannig knésetti Dr. Jón heimskt kerfið að mati Hugleiks sem nú er í miðju kafi við að skrifa um Ævintýri eineygða kattarins Kisa, annar hluti.