Flensubólusetning borgar sig

Beinn og óbeinn kostnaður af völdum svínaflensu gæti hér á landi numið 15 til 20 milljörðum samkvæmt útreikningum í síðasta hefti viðskipta- og efnahagsritsins Vísbendingar.

„Nú er allt útlit fyrir að svínaflensan illræmda, H1N1 verði einhver dýrasti faraldur sem herjað hefur á heimsbyggðina undanfarin ár. Kostnaðurinn er af margvíslegum toga,“ segir í umfjöllun ritsins. Stærsti kostnaðarliðurinn er sagður vinnutap, en þar á eftir kemur sjúkrahúslega og svo bólusetning. „Loks er talið að nokkur dauðsföll muni fylgja þessum faraldri. Auk þessa beina kostnaðar reikna margir erlendir sérfræðingar með óbeinum kostnaði við flensuna vegna minni umsvifa í hagkerfinu, en samkvæmt mati þeirra er hann allt eins mikill og sá beini.“

Niðurstaða blaðsins er sú að beinn kostnaður Íslendinga geti numið um 0,8 prósentum af vergri landsframleiðslu. „Hér verður ekki fjölyrt um óbeina kostnaðinn en ef hann er milli 50 og 100 prósent af beina kostnaðinum verður heildarkostnaður við flensuna milli 15 og 20 milljarðar króna hér á landi,“ segir í umfjöllun blaðsins. Ritstjóri Vísbendingar er Benedikt Jóhannesson tryggingastærðfræðingur.

Í umfjöllun Vísbendingar er bent á að samkvæmt mati Alþjóðabankans gæti kostnaður numið á milli 0,7 og 4,8 prósenta af vergri landsframleiðslu. Útreikningar Vísbendingar benda hins vegar til þess að hér verði kostnaðurinn nær neðri mörkum.

„Miklu skiptir auðvitað hver áhrif bólusetningar verða. Ef aðeins einn af sex sýkist í stað eins af þremur yrði kostnaðurinn ekki nema sex milljarðar króna í stað ellefu.“ Áréttað er að útreikningarnir sýni ljóslega hversu arðbært sé að bólusetja fólk. „Ef það hefði náðst að bólusetja alla fyrirfram hefði það skilað milli tíu og tuttugfaldri arðsemi af kostnaði við bóluefnið.“ - óká