Gagnrýnir lúxus í unglingafangelsi

Unglingafangelsið Warren Hill í Suffolk í Bretlandi sætir gagnrýni félagsmálayfirvalda þar eftir að fyrrverandi starfsmaður ljóstraði því upp að fangelsið minnti í besta falli á þægilegar sumarbúðir. Vistmenn fengju þar að njóta allra þeirra þæginda sem hugurinn girntist, þeir hefðu aðgang að risasjónvörpum og tölvuleikjum auk þess sem þeir gætu pantað sér vörur að vild. Þá virtist kannabisneysla ekki vera vandamál innan múranna og hefði einn fanginn sagt starfsmanninum að með því fengist ró í fangelsinu um nætur. Stjórnendur Warren Hill vísa áburðinum alfarið á bug.