Hitamet féllu ekki í Reykjavík

Óvenjuleg veðurblíða hefur verið á höfuðborgarsvæðinu í dag og raunar víðast á sunnan og vestanverðu landinu. Á Kjalarnesi og Hjarðarlandi í Biskupstungum hafa hitamælar verið að slá í 23 stig.

Sigurður Þ. Ragnarsson, veðurfræðingur fréttastofu, segir athygli vekja hve hlýtt sé í borginni. Allir mælar á höfuðborgarsvæðinu hafi náð um eða yfir 20 stigum og virðist sem hæsti hitinn í Reykjavík í dag hafi verið tæpar 22 gráður.

Sigurður segir það ekki á hverjum degi sem Reykjavíkin státi af hitatölum yfir 20 stigum en að þetta sé þó ekki met fyrir Reykjavík því 29. júlí í fyrra hafi hitinn náð 25,7 stigum í borginni og á sjálfvirkum mæli í Reykjavík fór hitinn í 26,4 gráður. Norðanlands hefur verið bjart en mun svalara.

Mestu hlýindin á landinu eru nú í rénun en besta veðrið næstu daga verður á suðvesturhorni landsins.