Danskir handrukkarar ætluðu að drepa fórnarlömbin með heróíni

Fimm karlar og ein kona sæta nú yfirheyrslum í Danmörku en þau eru grunuð um að hafa lagt á ráðin um að drepa konu og karl sem þau töldu að skulduðu sér peninga. Sexmenningarnir rændu parinu á á mánudagskvöld og keyrðu þau upp í sveit. Lögregla telur að þar hafi fólkið ætlað að myrða fórnarlömb sín með því að dæla í þau of stórum skömmtum af Heróíni.

Áður hafði parið verið þvingað til að grafa sínar eigin grafir. Fólkinu tókst hinsvegar að flýja og kalla eftir hjálp í næsta húsi.

Á meðan á prísund fólksins stóð rigndi yfir þau hótunum um að fingur yrðu klipptir af þeim og þau brennd með logandi töngum ef þau gerðu ekki upp skuldir sínar.