Almannatengill: Sigmundur átti að biðjast afsökunar strax

Þorsteinn G. Gunnarsson, ráðgjafi hjá almannatengslafyrirtækinu KOM, segir Sigmund Erni Rúnarsson hafa brotið grundvallareglur krísustjórnunar í kjölfar umræðu um meinta ölvun hans á Alþingi.

Þorsteinn þekkir vel til á sviði almannatengsla og krísustjórnunar. Hann segir Sigmund hafa brotið tvær mikilvægar reglur þegar kemur að krísustjórnun. „Að koma of seint fram, og segja ekki allan sannleikann í upphafi. Það er mannlegt að gera mistök. Það er mannlegt að reyna að réttlæta gjörðir sínar. Það er líka mannlegt í áföllum að missa svolítið sjónar á því sem er skynsamlegt og rétt í stöðunni," segir Þorsteinn. „Þess vegna var afneitun Sigmundar í fréttum RÚV afar óheppileg og yfirklórið í yfirlýsingunni hans um að hann hafi drukkið, en ekki verið drukkinn var einnig afar óheppilegt."

Hann segir að Sigmundur hefði átt að bregðast strax við umræðunni. „Ef hann hefði brugðist strax við og komið hreint fram, viðurkennt að hann hafi verið á golfmóti, viðurkennt að hafa tekið þátt í þessum kvöldverði, viðurkennt að hafa drukkið vín og farið síðann inn á Alþingi; talað um dómgreindarleysi sitt og beðið þjóðina auðmjúklega afsökunnar, þá hefði umræðan fyrir það fyrsta ekki verið eins mikil og hún var, fleiri hefðu fyrirgefið og staða hans væri núna mun betri en raunin er."

Aðspurður hver staða Sigmundar í dag er segir Þorsteinn: „Ég met það svo að með því að draga þetta á þennan hátt þá hafi umræðan orðið meiri og verri fyrir Sigmund. Um þetta mál verður fjallað í forsætisnefnd Alþingis og mér finnst rétt af honum að tjá sig ekki meira um málið fyrr en niðurstaða þess fundar liggur fyrir." Hann segir að nú sé brýnt fyrir Sigmund að vinna sér inn traust og virðingu að nýju.

„Það er ljóst að hann gerði mistök, hann er búinn að biðjast afsökunnar en hefði átt að gera það fyrr, og á meira afgerandi hátt."