Hagnaður af reglulegri starfsemi TM tæpar 500 milljónir

Hagnaður Tryggingamiðstöðvarinnar (TM) af reglulegri starfsemi á fyrri helmingi ársins 2009 var 491 milljónir kr. samanborið við 2,5 milljarða kr. tap á sama tímabili í fyrra.

Í tilkynningu um uppgjörið segir að hagnaður af vátryggingastarfsemi var 27 milljónir kr. fyrir skatta samanborið við 29 milljóna kr. hagnað á sama tímabili 2008. Fjárfestingatekjur félagsins voru jákvæðar sem nemur 2,2 milljörðum kr. á fyrri helmingi ársins en voru neikvæðar um 499 milljónir kr. á sama tímabili 2008.

Eigin tjónakostnaður lækkaði um 6% og var 4,2 milljarðar kr. á fyrri helmingi ársins samanborið við tæpa 4,5 milljarða kr. á sama tímabili 2008. Eigið fé nam 8,6 milljörðrum kr. og eiginfjárhlutfall var 28% þann 30. júní 2009.

„Helsta verkefni félagsins undanfarin misseri hefur verið að bæta afkomu af vátrygginga-starfseminni. Sú vinna hefur haft þau áhrif að hægt hefur verulega á vexti og tjónakostnaður lækkar milli ára," segir Sigurður Viðarsson, forstjóri TM, í tilkynningunni.

„Markmið um að bæta afkomu eignatrygginga og frjálsra ökutækjatrygginga náðust þegar á fyrri hluta ársins. Afkoma skipa-, slysa- og ábyrgðatrygginga á tímabilinu veldur hins vegar vonbrigðum.

Unnið er markvisst að úrbótum og mun sú vinna halda áfram þar til jafnvægi hefur náðst. Árangur þeirrar vinnu ætti að verða ljós á fyrsta fjórðungi næsta árs.

Afkoma félagsins af fjárfestingastarfsemi skýrist að mestu af vaxtatekjum, kröfulækkun ríkistryggðra skuldabréfa og hækkun hlutabréfa. Hagnaður af aflagðri starfsemi skýrist af gengishagnaði við sölu á norska vátryggingafélaginu Nemi.

Fjárhagsleg staða TM er sterk og eignir á móti vátryggingaskuld (bótasjóður) traustar. Geta félagsins til að standa við skuldbindingar sínar er vel umfram það sem opinberir aðilar gera kröfur um."