Frekari lækkun íbúðaverðs er óhjákvæmileg

Í því efnahagsástandi sem nú ríkir hér á landi er frekari lækkun á íbúðaverði óhjákvæmileg að mati greiningar Íslandsbanka. Hin mikla uppsveifla undanfarinna ára á íbúðamarkaði hefur orðið til þess að nú þegar ládeyða hefur verið á þessum markaði situr eftir mikill fjöldi nýrra óseldra íbúða á framboðshlið markaðarins sem skapar frekari þrýsting til verðlækkunar.

Fjallað er um málið í Morgunkorni greiningarinnar. Þar segir að auki er atvinnuleysi vaxandi á næstunni, fólksflótti mun verða nokkur úr landi, ráðstöfunartekjur munu lækka frekar, skattar munu hækka og greiðsluerfiðleikar heimilanna vera talsverðir. Þessir þættir munu draga enn úr spurn eftir íbúðum.

Opinberar spár um þróun húsnæðisverðs á næstu misserum gera ráð fyrir frekari verðlækkunum á fasteignamarkaði. Samkvæmt þeim mun íbúðaverð lækka hátt í 50% að raunvirði frá því að hápunktinum var náð áður en yfirstandandi lægð lýkur á fasteignamarkaði árið 2011. Gangi þessar spár eftir er enn nokkur verðlækkun í pípunum þó að hið mesta sé afstaðið.

Frá því að húsnæðisverð á höfuðborgarsvæðinu náði toppi í byrjun síðasta árs hefur það lækkað um 12,2% að nafnvirði og um tæplega 36% að raunvirði. Á sama tíma hefur íbúðaverð verið að lækka í löndunum umhverfis okkur enda hefur fjármálakreppan komið víða við og verðbólan sem varð í aðdraganda hennar var stór í mörgum löndum og sprakk í kjölfarið með tilheyrandi lækkunum.

Í nýlegri úttekt Alþjóðagjaldeyrissjóðsins á því hve mikil húsnæðisverðslækkunin hefur verið í einstökum löndum í lækkuninni nú kemur í ljós að lækkunin hefur verið með því mesta hér að raunvirði. Samanburðurinn tekur til 52 landa og er lækkunin mæld frá fyrsta fjórðungi 2008 til fyrsta fjórðungs 2009.

Lækkunin hér er sú fimmta mesta á meðal þessara landa en meiri hefur lækkunin verið í Lettlandi (57%), Eistlandi (36%), Sameinuðu furstadæmunum (35%) og Litháen (26%). Að meðaltali lækkaði raunverð íbúðarhúsnæðis um 7% í þessum 52 löndum á þessu eina ári en nú virðist botninn víða vera kominn í húsnæðislækkunum.