Skrefi á undan

Reykjavíkurborg býður til Hugmyndaþings í Tjarnarsal Ráðhúss Reykjavíkur á sunnudaginn milli kl. 13 og 16. Hugmyndaþingið er liður í þeirri viðleitni borgarstjórnar að hvetja til aukinnar þátttöku íbúa í ákvarðanatöku og stefnumótun fyrir borgina.

Á þinginu verður kynnt ný áætlun til sóknar fyrir Reykjavíkurborg sem unnin var í vor að frumkvæði borgarstjórnar. Stofnaður var stýrihópur einstaklinga með breiða reynslu úr atvinnu-, háskóla- og menningarlífi og leitað álits rýnihópa íbúa, starfsmanna, fræðimanna, ungmenna og atvinnurekenda í því skyni að greina tækifæri Reykjavíkurborgar á breiðum grunni. Kjörnir fulltrúar tóku jafnframt virkan þátt í verkefninu.

Sóknaráætlunin, sem kynnt er undir yfirskriftinni Skrefi á undan, hefur að geyma 8 áhersluþætti með samtals 35 lykilaðgerðum og fjölmörgum tillögum. Með aðgerðunum er reynt að draga úr neikvæðum langtímaáhrifum efnahagsvandans með því að horfa á tækifæri til sóknar.

Nokkrir rauðir þræðir komu skýrt fram í vinnunni og má meðal þeirra nefna afgerandi áherslu á mikilvægi umhverfismála og að Reykjavíkurborg móti metnaðarfulla stefnu sem skipi henni í fremstu röð grænna borga. Annar meginflokkur hefur titilinn Framtíðarfólkið. Reykjavík er ung borg og í því felast mörg hennar stærstu tækifæri. Því er lagt til að börn, unglingar og ungt fólk verði í forgangi og hlúð verði sérlega vel að málaflokkum sem tengjast þessum hópum með beinum hætti.

Þriðji þráðurinn sem hér verður nefndur snýr að atvinnulífinu. Kröftugt atvinnulíf er grunnurinn að lífvænlegri borg og skilyrði fyrir því að ungt fólk kjósi Reykjavík sem sitt framtíðarheimili. Borgin þarf að stuðla að uppbyggingu fjölbreytts og verðmætaskapandi atvinnulífs og tryggja jafnframt sterka innviði og skilvirkt stjórnkerfi.

Með Hugmyndaþinginu á sunnudaginn er kallað eftir kröftum borgarbúa við að móta skýra framtíðarsýn fyrir Reykjavík. Þar verður jafnframt boðið upp á nokkra stutta, skemmtilega fyrirlestra og hugmyndasmiðjur þar sem íbúar borgarinnar geta komið á framfæri sínum eigin hugmyndum um framtíð borgarinnar. Ég hvet því alla til að líta við í Ráðhúsinu á sunnudaginn og leggja sitt að mörkum til þess að Reykjavík móti sér metnaðarfulla framtíðarsýn um mannvænlega borg.

Höfundur er formaður stýrihóps um mótun sóknaráætlunar fyrir Reykjavík.