Baldur þarf sjálfur að bera kyrrsetninguna undir dómstóla

Baldur Guðlaugsson, fyrrverandi ráðuneytisstjóri í fjármálaráðuneytinu, þarf sjálfur að að bera ágreining vegna kyrrsetningar á hluta hluta eigna sinna fyrir dómstóla til að fá henni hnekkt.

Eins og fréttastofa Stöðvar 2 greindi frá á þriðjudag, fyrst fjölmiðla, kyrrsetti embætti sérstaks saksóknara hluta eigna Baldurs sem nemur söluandvirði hlutabréfa hans í Landsbankanum 17. september á síðasta ári.

Grunur leikur á að Baldur, sem seldi hlutabréf fyrir á annað hundrað milljónir króna, hafi verið tímabundinn innherji í skilningi laga um verðbréfaviðskipti og því ekki mátt selja bréfin samkvæmt sömu lögum. Kyrrsetningin var gerð í síðustu viku þegar beiðni var send til Sýslumannsins í Reykjavík.

Samkvæmt heimildum fréttastofu er rannsókn sérstaks saksóknara langt komin. Ef embættið tekur ákvörðun um að fella niður rannsókn á meintum innherjaviðskiptum Baldurs fellur kyrrsetningin sjálfkrafa úr gildi, en engar vísbendingar eru um að það sé uppi á teningnum. Með sama hætti fellur kyrrsetningin niður ef Baldur verður sýknaður með endanlegum dómi.

Fram kemur í frétt Þórðar Snæs Júlíussonar í Viðskiptablaðinu í dag að embætti sérstaks saksóknara hafi þegar yfirheyrt Baldur og að hann sé jafnframt hæst setti embættismaður Íslendinga sem ákæruvald hafi rannsakað vegna gruns um brot.