Níu sprotafyrirtæki fengu viðurkenningu

Í tilkynningu segir að þetta sé fyrsta brautskráning sprotafyrirtækja úr Viðskiptasmiðjunni en hún var sett á fót í september 2008. Verðlaunaafhending fór fram á Grand Hótel, föstudaginn 11. desember 2009.



Við þetta tilefni sagði Katrín Júlíusdóttir, iðnaðarráðherra, að það væri mikilvægt að fjalla meira um sprotafyrirtæki á Íslandi og þá góðu hluti sem eru að gerast hjá þessum fyrirtækjum. Hún sagði einnig að ríkisstjórnin vildi styðja þessi fyrirtæki og lægju tvö frumvörp fyrir alþingi sem myndu hjálpa sprotafyrirtækjum mikið.

Eyþór Ívar Jónsson, framkvæmdastjóri Klaks - Nýsköpunarmiðstöðvar atvinnulífsins, fjallaði um upphaf Viðskiptasmiðjunnar - Hraðbraut nýrra fyrirtækja og benti á að Viðskiptasmiðjan er eitt best heppnaðasta samfélagsverkefni seinni ára enda væri verðmæti þeirra fyrirtækja sem eru í Viðskiptasmiðjunni talið í milljörðum króna.

Klak er jafnframt eitt af fáum fyrirtækjum landsins sem geta kallað sig samfélagslegt sprotafyrirtæki sem eru fyrirtæki sem afla sinna eigin tekna, eru rekin með hagnaðarsjónarmiði en snúast fyrst og fremst um samfélagslegan ávinning. Viðskiptasmiðjan - Hraðbraut nýrra fyrirtækja er tæki sem býr til tæki sem eru sprotafyrirtæki.

Jón Ingi, framkvæmdastjóri Trackwell sagði að eins og svo margir frumkvöðlar og framkvæmdastjórar sprotafyrirtækja þá hefði hann ekki ætlað í Viðskiptasmiðjuna af því að hann taldi ekki þörf á því. Hann hefði hins vegar séð að það væri nauðsynlegt að fá hjálp til að fjármagna fyrirtækið og þau nýsköpunarverkefni sem fyrirtækið er að vinna að.

Á fyrstu önn skrifaði Jón Ingi viðskiptaáætlun fyrir Viðskiptasmiðjuna og Trackwell var fyrsta fyrirtækið sem áhættufjárfestingarsjóðurinn Frumtak fjárfesti í. Jón Ingi sagði að það sem hefði átt að vera stutt viðdvöl í Viðskiptasmiðjunni hefur verið mun lengra ferðlag og Trackwell hefði braggast sem aldrei fyrr. Hann sagði: „Ástæðan er einföld. Viðskiptasmiðjan virkar."